Kadr rezervin jasaqtaý: Birinshi kezeń nátıjesi jarııalandy
«Azamattarǵa arnalǵan úkimet» memlekettik korporatsııasy jobanyń bastalǵany jóninde 1 naýryzda jarııalaǵan bolatyn. Nıet bildirýshiler 12 kún ishinde saıtta tirkelip, biliktiligi týraly qujattardy tapsyrýy qajet boldy. Nátıjesinde kadr rezervine qatysýǵa 1650 qazaqstandyq ótinim berdi.
«Testileýdiń birinshi kezeńinen 1246 adam ótti, úmitkerler logıkalyq testileýdiń 78 suraǵyna jaýap berdi. Kelesi kezeńge saýaldardyń 30% durys jaýap bergen 1067 úmitker jiberildi», - dedi memkorporatsııadan.
Jobaǵa tirkelgenderdiń arasynda Nur-Sultan qalasy men Almaty oblysynyń turǵyndary basym (25% astam). Eń az ótinim Pavlodar oblysynan kelip túsken.
Daryndylar pýlyna qatysýshylardyń 8% astamynda 10 jyldan astam jumys ótili bar. Іrikteýdiń birinshi kezeńinen ótken úmitkerlerdiń qorytyndy tizimi talent.gov4c.kz saıtynda jarııalanǵan.
Testileýdiń ekinshi kezeńinde úmitkerlerdiń Qazaqstan Respýblıkasynyń zańnamasy boıynsha bilimi tekseriledi. Qatysýshylar QR Konstıtýtsııasy, «Memlekettik qyzmetter týraly», «Derbes derekter týraly», «Sybaılas jemqorlyqqa qarsy is-qımyl týraly», «Jeke jáne zańdy tulǵalardyń ótinishteri týraly» jáne «Aktsıonerlik qoǵamdar týraly» zańdar boıynsha 1,5 saǵat ishinde 90 suraqqa jaýap berýi qajet.
Testileýden keıin qorytyndy kezeńge ótken úmitkerler memlekettik jáne qoǵam qaıratkerlerinen, HR-sarapshylarynan jáne memlekettik korporatsııanyń Basqarma múshelerinen quralǵan sarapshylyq keńes múshelerimen áńgimelesýden ótedi. Joǵary ball jınaǵan jáne áńgimelesý kezeńinen sátti ótken úmitkerler keıinnen tıisti bos laýazymdarǵa taǵaıyndaý úshin daryndylar pýlyna qabyldanady.