Qadir túninde Túrkimenstan basshysy 600-den astam adamǵa raqymshylyq jasady

ASTANA. QazAqparat - Túrkimenstan Prezıdenti Qurbanǵuly Berdimuhamedov Ramazan aıynyń qasıetti túninde 612 adamǵa raqymshylyq jasady, dep habarlaıdy RIA Novostı jergilikti BAQ-qa silteme jasaı otyryp.

Úkimet otyrysynda memleket basshysy qol qoıǵan jarlyqtarǵa sáıkes, sottalǵan 586 Túrkimenstan azamaty jáne 26 shet memleket azamattary negizgi jazasyn óteýden, belgili bir aýmaqta turý mindeti túrindegi qosymsha jazany óteýden bosatylady.

Qujattarǵa qol qoıǵan Prezıdent laýazymdy tulǵalarǵa Qadir túnin otbasymen birge kútý úshin raqymshylyq etilgen azamattardy tezirek bosatýdy jáne jumyspen qamtý máselelerin sheshýge kómektesýdi tabystady. 

Raqymshylyq etý naýqany Túrkimenstanda jıi bolyp turady. Jylyna 3-4 ret ulttyq meıram kezderi qylmyskerlerge keshirim beriledi. Shetelde sóz sóıleý kezinde Q.Berdimuhamedov «Túrkimenstan túrmelerindegi jaza óteýshiler sany on myńnan aspaıdy» degen bolatyn.

foto: https://ria.ru/