Qadir túni: ShQO bas ımamy jurtshylyqty meshitke jınalmaýǵa shaqyrdy
Bul týraly Qazaqstan musylmandar dinı basqarmasynyń Óskemen aımaǵy boıynsha bas ımamy Ermek Muqataı baspasóz máslıhaty barysynda málim etti.
Óz sózinde ol indettiń aldyn alý maqsatynda bıyl Qadir túnin otbasymen birge úıde ótkizýge keńes berdi.
«Búkil álem aýyr synaqty bastan keship jatyr. Koronavırýs elimizdegi keıbir dinı sharalardyń ótýine aıtarlyqtaı keri áserin tıgizdi. Desek te, qaýipti dertti birge jeńýimiz kerek. Ol úshin shekteý sharalaryn qatań saqtaýǵa shaqyramyn. Pandemııaǵa baılanysty bıyl Qadir túnin meshitte ótkizbeıtin boldyq. Sondyqtan ýaǵyzdy onlaın aıtamyz», - dedi Ermek Muqataı.
Onyń aıtýynsha, osydan bylaı óńir meshitterinde karantın talaptaryn saqtaı otyryp juma namazyn oqýǵa ruqsat etilgen.
«Erteńnen bastap meshitterde juma namazyn oqýǵa bolady. Vırýs órshýiniń aldyn alý maqsatynda juma namazy meshit aýlasynda oqylady. Meshitke kelýshilerde mindetti túrde maska men qolǵap bolýy kerek. Sonymen qatar dáretti úıden alyp shyǵyp, múmkin bolsa ózderińizben birge jaınamaz ala kelýdi suraımyz», - dedi bas ımam.