«KADEX» kórmesinde qazaqstandyq qorǵanys-ónerkásibi kesheniniń tyń jetistikteri kórsetiledi

ASTANA. QazAqparat - «KADEX - 2016» halyqaralyq kórmesi - bul sońǵy ýaqyttaǵy qazaqstandyq qorǵanys salasyndaǵy eń aýqymdy jáne suranysqa ıe is-shara. Kórmede qazaqstandyq qorǵanys-ónerkásibi kesheniniń tyń jetistikteri, sondaı-aq álemdik perspektıvalyq ázirlemeler kórsetiledi. Bul týraly QR Qorǵanys mınıstrliginiń baspasóz qyzmetinen habarlady.

 «KADEX» kórmesi bıyl tórtinshi ret ótkizilgeli otyr.  Jyl saıyn kelissózder ótkizý úshin Astanamyzda ótetin is-sharaǵa keletin qarý-jaraq, áskerı jáne arnaıy tehnıka óndiretin qazaqstandyq jáne sheteldik qatysýshylardyń, iskerlik orta ókilderiniń sany artyp keledi. Eger 2010 jyly kórmege 156 qazaqstandyq jáne sheteldik kompanııalar qatyssa, 2012 jyly - 253, 2014 jyly - qatysýshy kompanııalardyń sany 300-ge jetti.

Osy jyly kórme baǵdarlamasy mazmundy jáne áserli bolady. Ekspozıtsııa 8 pavılonda jáne ashyq alańdarda óristetildi.  Jalpy kórme alańy 90 000 sharshy metrdi quraıdy.

Kórmege shetel memleketteri qorǵanys vedomstvolarynyń 40-tan asa resmı delegatsııasy, sondaı-aq statıka túrinde óz ónimderin usynyp, tehnıkanyń áreket etýdegi múmkindikterin kórsetetin álemniń ár elinen áskerı tehnıka shyǵaratyn 350-den asa kompanııa keldi.  

Zamanaýı tehnologııalardyń damýy men olardyń ómirimizge, onyń ishinde qorǵanys ónerkásibine yqpal etýin eskere otyryp, bıylǵy jyly kórmeniń negizgi sektsııalaryn biz IT-tehnologııalar, robot tehnıka, avıatsııa, ushqyshsyz ushý apparattary men qorǵanys pen qaýipsizdik salasyndaǵy ózge de ozyq baǵyttar aıasyndaǵy tyń jańalyqtarǵa arnadyq.

Alǵash ret qazaqstandyq óndiristiń «Arlan» brondalǵan dóńgelekti mashınalary men  «Barys» brondy transportery kórsetiletin bolady. Bul urys mashınalary Qarýly Kúshteriniń muqtajdyǵy úshin otandyq kásiporynda shyǵarylady.

Kórmeniń kórsetilim baǵdarlamasy Qazaqstan Qarýly Kúshteriniń arnaıy bólimsheleri jáne áskerı bólimderdiń jaraqtandyrýynda turǵan jaýyngerlik tehnıkanyń qatysýymen kórsetpeli kórsetilimderdi qamtıdy.  Qatysýshylar men qonaqtar qazaqstandyq ÁÁK-niń avıtatehnıkasyn, Qurlyq áskerleri áskerı tehnıkasynyń úlgilerin tamashalaı alady.

«Qazaqstan ınjınırıng» kompanııasynyń toby  kórmede 20 kásiporynmen usynylǵan. Ashyq alańdarda 47 úlgi, jabyq pavılondarda 95 úlgi jáne 27 sulba usynylǵan.

Іs-sharanyń aýqymdylyǵy brondy tankti tehnıkanyń jáne qarý-jaraqtardyń ózge de túrleriniń paıdalaný, jaýyngerlik qasıetterin kórsetýge múmkindik beredi. Onyń ishinde, sheteldik seriktesterdiń óndirisimen birlese qarý-jaraqtyń ázirlemeleri men úlgileri, sondaı-aq enshiles uıymdarymyzdyń ónimi alǵash ret pash etiledi. Atap aıtqanda:

- ártúrli modıfıkatsııadaǵy Mı-17 jańǵyrtylǵan tikushaqtary;

- T-72A, T-72B jańǵyrtylǵan tankteri;  

- ártúrli qarý-jaraǵy bar ártúrli modıfıkatsııadaǵy «Arlan» brondalǵan dóńgelekti mashınalary;  

- optıka-elektrondyq prıborlar men kollımatorlyq tirkemeler.