KADEX-2018: Túrik kompanııasy Qazaqstanda brondy mashınalardy shyǵaratyn boldy

ASTANA. QazAqparat - «Qazaqstan Injınırıng» holdıngi men Túrkııanyń «Otokar» kompanııasy seriktestik týraly memorandýmǵa qol qoıdy. Seriktestik Qazaqstan aýmaǵynda birlese otyryp, brondy mashınalardy qurastyrýǵa jol ashyp otyr, dep habarlaıdy QazAqparat tilshisi.

Qol qoıylǵan qujat aıasynda qazaq-túrik birlesken kásiporyny Qazaqstan aýmaǵynda kólik quraldaryn, sonyń ishinde brondy mashınalardy jańǵyrtý, jóndeý, sonymen qatar jobalaý, qurastyý jáne tasymaldaý jumysyn júzege asyratyn bolady.

«Tehnıkalyq-ekonomıkalyq negizdemesi jáne QR-da brondy mashınalardyń óndirisi boıynsha birlesken bıznes-jospary boıynsha «Qazaqstan Injınırıngpen» jasalǵan bul memorandým bizdiń Qazaqstanmen birlese jumys júrgizý nıetimizdi bekemdeı túsedi», - deıdi «Otokar» kompanııasynyń bas dırektory Serdar Gergıých «KADEX-2018» V halyqaralyq kórmesinde qujatqa qol qoıý rásiminen soń.

Ol brondy mashınalar qazirdiń ózinde Qazaqstanda qoldanysta ekenin eske saldy.

«Osylaısha, qujat Qazaqstan Respýblıkasynyń Qarýly Kúshteri úshin brondy mashınalardy birlese jasaýǵa qaraı baǵyttalǵan alǵashqy qadam bolyp otyr», - dedi ol.

Eske sala ketsek, «KADEX-2018» V halyqaralyq kórmesi bastalǵan kúni (keshe) «Otokar» kompanııasynyń bas dırektory Serdar Gergıých kompanııanyń brondy mashına jasaý tehnologııasyn Qazaqstandaǵy óndiriske engizýge daıyn ekenin málim etken bolatyn.

Dál sol kúni kórme aıasyndaǵy sessııada «Otokar» kompanııasynyń bıznesti damytý boıynsha dırektory Tamer Sırkalı túrkııalyq áskerı brondy dóńgelekti kólikterdiń áleýeti týraly aıtyp bergen edi.