«KADEX-2018» kórmesinde jańa KAMAZ júk kólikteri tanystyrylady

ASTANA. QazAqparat - V Halyqaralyq qarý-jaraq jáne áskerı-tehnıkalyq múlik «KADEX-2018» kórmesinde «KAMAZ-Injınırıng» qazaqstandyq-reseılik birlesken kásiporny júk jáne arnaýly tehnıkalardy kórsetedi.

QR Qorǵanys jáne aeroǵarysh ónerkásibi mınıstrligi baspasóz qyzmetiniń habarlaýynsha, olardyń ishinde shanaq-kúımesi bar jóndeý-qalpyna keltirý jáne akkýmýlıatorlyq batareıalardy zarıadtaý stantsııasy, kópmaqsatty avtokólikterdi jóndeý, tehnıkalyq qyzmet kórsetý jáne evakýatsııalaýǵa arnalǵan tehnıkalyq kómekshi mashınasy bar.

Kórmege kelýshilerdiń nazaryna arnaıy tehnıkany tasymaldaýǵa, qosýǵa jáne paıdalanýǵa, jer ústine ornalastyrý men komandalyq quram ókilderiniń jumysyn qamtamasyz etýge arnalǵan shanaq-kúımesi usynylady.

Kórmege jeke quramdy tasymaldaýǵa arnalǵan KAMAZ 43118 shassıine ornalasqan vahtalyq avtobýs, ózi aýdarǵysh avtomobıl, avtojanarmaıquıǵysh, borttyq platforma, KAMAZ shassıindegi ekskavator men burǵy-kran mashınasy qoıylady.

«KAMAZ-Injınırıng» AQ - Qazaqstandaǵy tehnıkalyq turǵyda eń jaqsy jabdyqtalǵan jáne jańartylǵan kásiporyndardyń biri. Búgingi tańǵa deıin zaýyt 12,5 myńnan astam KAMAZ avtokóligin óndirdi. Olar jasaǵan kólikter mynalar: samosvaldar, borttyq mashınalar, tartqyshtar, vahtalyq avtobýstar, aýyz sýǵa jáne tehnıkalyq sýǵa arnalǵan avtotsısternalar, kommýnaldyq kólikter.

«Qazaqstan ınjınırıng» ulttyq kompanııasymen birlesip avtomobılderdi qurastyrý 2005 jyly Kókshetaý qalasynda bastalǵan.