«KADEX-2016» kórmesi qarsańynda jýrnalıster arasynda baıqaý jarııalandy

ASTANA. QazAqparat - IV halyqaralyq «KADEX» qarý-jaraq pen áskerı-tehnıkalyq múlik kórmesiniń ótkizilýine oraı Qazaqstan Respýblıkasynyń Qorǵanys mınıstrligi jýrnalıster arasynda respýblıkalyq shyǵarmashylyq baıqaý uıymdastyrdy.

Mınıstrliktiń baspasóz qyzmetiniń habarlaýynsha, halyqaralyq kórme taqyrybyn úzdik jýrnalıstik jarııalaý turǵysyndaǵy shyǵarmashylyq baıqaýdyń negizgi maqsaty - atalmysh kórme taqyrybyn talqylaýǵa jýrnalısterdi tartý. Baıqaý Qazaqstanda shyǵatyn qalalyq jáne respýblıkalyq buqaralyq aqparat quraldary, sondaı-aq elektrondyq buqaralyq aqparat quraldary arasynda memlekettik jáne orys tilderinde jeke atalymdar boıynsha ótkiziledi.

Baıqaýǵa qatysýǵa gazet, radıo jáne televıdenıe, aqparattyq agenttikterdiń jýrnalısteri, sondaı-aq Astanadaǵy IV halyqaralyq «KADEX» qarý-jaraq pen áskerı-tehnıkalyq múlik kórmesiniń ótkizilýi týraly materıaldardy jarııalaıtyn jáne basyp shyǵaratyn shtattan tys avtorlar shaqyrylady. Baıqaýǵa usynylatyn materıaldar 10 maýsymǵa deıin qabyldanady.

Baıqaý jumystary kórmeniń ótkizilýi kezindegi ańdatpa oqıǵalardy jarııalaý boıynsha materıaldardan, sondaı-aq kórmeniń ótkizilý qorytyndysy boıynsha materıaldardan turýy múmkin.

Jeńimpazdar bes atalym boıynsha anyqtalady. Atap aıtqanda, «Baspa basylymdaryndaǵy úzdik jarııalanym», «Internet-basylymdardaǵy úzdik jarııalanym», «Úzdik telesıýjet/telebaǵdarlama», «Úzdik radıosıýjet/radıobaǵdarlama, «Úzdik fotoreportaj/fotoocherk».

Baıqaý erejeleri jáne sharttarymen QR Qorǵanys mınıstrliginiń mod.gov.kz resmı saıtynyń KADEX bóliminde tanysýǵa bolady. Qazaqstandyq jýrnalıstıka kúni kásibı merekesi qarsańynda baıqaý jeńimpazdaryn marapattaý rásimi ótkiziledi.