«KADEX-2014» halyqaralyq kórmesi aıasynda S.Ahmetov sheteldik áriptesterimen kezdesti

ASTANA. QazAqparat - Búgin Qorǵanys mınıstri Serik Ahmetov «KADEX-2014» úshinshi halyqaralyq qarý-jaraq jáne áskerı-tehnıkalyq múlik kórmesi aıasynda birqatar ekijaqty kezdesýler ótkizdi.

RF Úkimeti tóraǵasynyń orynbasary Dmıtrıı Rogozınmen kezdesý barysynda áskerı saladaǵy yntymaqtastyqty odan ári nyǵaıtý máseleleri talqylandy, dep habarlaıdy QR Qorǵanys mınıstrliginiń baspasóz qyzmetinen.

Eki taraptyń pikirinshe, Qazaqstan men Reseı arasyndaǵy áskerı jáne áskerı-tehnıkalyq saladaǵy ózara sátti is-qımyldar úshin qajetti barlyq jaǵdaılar jasalǵan.

Sondaı-aq Frantsııa qorǵanys mınıstrliginiń delegatsııasyn bastap kelgen qarý-jaraq generaly Jan Krıstof Nýromen júzdesý barysynda QR Qarýly Kúshteriniń qarý-jaraǵyn jetildirýde eki eldiń qorǵanys vedomstvolarynyń yntymaqtastyǵynyń mańyzdylyǵy atap ótildi.

Sonymen qatar S.Ahmetov Qazaqstannyń áskerı-tehnıkalyq saladaǵy yntymaqtastyǵynyń perspektıvalaryn ıspan tarabynyń ókilderi - «Grupo AGEM» kompanııasynyń prezıdenti Pedro Ermosılıamen jáne qorǵanys eks-mınıstri Hose Bono Martınaspen kezdesýi barysynda talqylady.