Qabyldanǵan zańdardyń shıkiliginen olarǵa ózgertýler men túzetýler jıi engiziledi - senator Q. Aıtahanov

ASTANA. 14 qarasha. QazAqparat - Bıýdjettik kodeks «prohodnoı dvor» ma? Búgin Parlament Senatynyń jalpy otyrysynda Bıýdjet kodeksine engizilip jatqan ózgeristerdi synǵa alǵan senator Qýanysh Aıtahanov osylaı málimdedi. Eske salsaq, jalpy otyrysta «Qazaqstan Respýblıkasynyń keıbir zańnamalyq aktilerine bıýdjet zańnamasyn jetildirý máseleleri boıynsha ózgerister men tolyqtyrýlar engizý týraly» zań jobasy talqylanǵan bolatyn.

Sóz arasynda depýtat Elbasy udaıy Parlament pen Úkimetten sapaly zań qabyldaýdy talap etip kele jatqanyn, alaıda qabyldanǵan zańdardyń shıkiliginen olarǵa ózgertýler men túzetýler jıi engiziletinin atap ótti. «Árıne, ómir bir ornynda turmaıdy. Ol turaqty damý ústinde bolǵandyqtan qoldanystaǵy zańnamalar jańaryp turýy zańdy. Alaıda, Parlamentke kelip túsetin zań jobalary tereń zerdelenbeı, jetilmeı kelip jatyr. Munyń ózi qabyldanǵan zańdardyń jumys isteýine keri áserin tıgizip, azamattardyń zańǵa degen senimsizdigin arttyrady», - deıdi Q. Aıtahanov. Bul rette senator 2009 jyly qabyldanǵan salyq kodeksin alǵa tartyp, atalmysh kodekske 3 jyldyń ishinde 69 ret tolyqtyrý engizilgenin alǵa tartty. Depýtattyń aıtýynsha, salyq júıesindegi turaqsyzdyq salyq tóleýshilerdiń narazylyǵyn týdyryp, elimizge ınvestıtsııalardyń kelýine keri áserin tıgizedi. «Al búgingi talqylanyp otyrǵan Bıýdjet kodeksine tórt jyl ishinde 42 ret ózgeris ense, sonyń 10-y bıylǵy jyldyń enshisinde. Búgin taǵy ózgeris engizip otyrmyz. Jarty jyldan keıin mınıstr Dosaev taǵy bir qushaq ákelem dep otyr. Sonda ne Bıýdjet kodeksi «prohodnoı dvor» ma?», - dedi senator.

Bul rette toqsan saıyn kodekske ózgeris engizilse, odan esh abyroı qalmaıtynyn, tipti bara-bara azamattar ony basshylyqqa alýdan qalatynyn aıtty.