Qabyldanǵan zańda jaıylymdyq jerlerdi paıdalaný máseleleri retteledi - Senat tóraǵasy

NUR-SULTAN. QazAqparat – Senat tóraǵasy Máýlen Áshimbaev Parlamenttiń jer qatynastaryn damytý máseleleri boıynsha zańdy qabyldaýyna baılanysty pikir bildirdi, dep habarlaıdy QazAqparat tilshisi.

Engizilgen jańa normalarǵa sáıkes aýylsharýashylyq jerlerin satýǵa moratorıı 2026 jylǵy 31 jeltoqsanǵa deıin uzartyldy. Jalǵa alý tek Qazaqstan azamattary men sheteldik qatysýy joq zańdy tulǵalar úshin ǵana qoljetimdi bolyp qala beredi. Al, aýyl sharýashylyǵy jerlerin sýbarendaǵa berýge tyıym salynady. Bul zań Memleket basshysynyń tapsyrmalaryn oryndaý maqsatymen Jer reformasy jónindegi komıssııa jumysynyń qorytyndysy boıynsha ázirlendi.

«Bul zańda jerdi qorǵaýǵa, ony utymdy jáne maqsatty paıdalanýǵa arnalǵan jańa normalar qarastyrylǵan. Soǵan sáıkes Qazaqstan azamattaryna aýyl sharýashylyǵy jerlerin jekemenshikke berý jóninde Jer kodeksindegi normalardyń qoldanylýyna moratorıı uzartylady. Qujatqa jaıylymdyq jerlerdi paıdalaný máselelerin retteıtin, jer ýchaskeleri boıynsha aqparattyń qoljetimdiligi men ashyqtyǵyn qamtamasyz etetin jańa normalar da engizildi. Onyń bári elimizdiń ulttyq múddesine tolyǵymen sáıkes keledi», – dedi Senat tóraǵasy.

Budan buryn habarlanǵandaı, Parlament Senatynyń jalpy otyrysynda palata depýtattary «Qazaqstan Respýblıkasynyń keıbir zańnamalyq aktilerine jer qatynastaryn damytý máseleleri boıynsha ózgerister men tolyqtyrýlar engizý týraly» Zańyn eki oqylymda qarap, qabyldady.

Eske salsaq, 2016 jyly Memleket basshysynyń Jarlyǵymen Jer kodeksiniń jekelegen baptarynyń qoldanysyna moratorıı engizilgeni belgili. Bul moratorıı 2021 jyly 31 jeltoqsanda aıaqtalady.