Qabyldanǵan sharalarǵa qaramastan, strategııalyq taýarlardyń ımporttyq kórsetkishteri áli de joǵary - M. Kópeı

ASTANA. Jeltoqsannyń 4-i. QazAqparat /Qanat Mámetqazyuly/ - Qabyldanǵan sharalarǵa qaramastan, strategııalyq taýarlardyń, onyń ishinde azyq-túliktiń ımporttyq kórsetkishteri áli de joǵary bolyp otyr. Búgin QR Parlamenti Senatynda «Taýarlardy, qyzmetterdi satyp alý barysynda qazaqstandyq qamtý úlesin arttyrýdyń memlekettik saıasaty» atty taqyrypta ótken dóńgelek ústel jıynynda Senat Tóraǵasynyń orynbasary Muhambet Kópeı osylaı málim etti,

dep habarlaıdy QazAqparat.

 «Osy ýaqytqa deıin de otandyq ónimniń básekege qabilettigin qamtamasyz etý, otandyq ekonomıkanyń ımportqa táýeldiligin eńserý, óndiristiń tehnıkalyq deńgeıin arttyrý baǵdarlamalary júzege asyp keldi. Alaıda, ókinishke qaraı ártúrli obektıvti jáne sýbektıvti sebepterge baılanysty bul sharalar tolyq kólemde iske aspaı otyr. Máselen, 2001 jyly jeńil jáne tamaq ónimderi salasynda ımport almastyrýdyń 2001-2003 jyldarǵa arnalǵan baǵdarlamasy bekitilgen. Ony iske asyrý arqyly tamaq ónerkásibinde otandyq  ónimniń úlesin ishki tutynymda 85 paıyzǵa, al jeńil ónerkásipti 55 paıyzǵa deıin jetkizý josparlanǵan edi. Sondaı-aq, 2007 jyly belsendi eksporttyq saıasatty júrgizýdi kezeń-kezeńimen turaqty damytýdy, ǵylymǵa negizdelgen ekonomıkany nysanaǵa alǵan 2008-2015 jyldarǵa arnalǵan tujyrymdama maquldanǵan bolatyn. Bunyń maqsaty el ekonomıkasynyń básekege qabilettiligin arttyryp, sapaly jańa deńgeıge, eksporttyq múmkindikterge jetý bolatyn. Qabyldanǵan osyndaı sharalarǵa qaramastan, strategııalyq taýarlar, onyń ishinde azyq-túlik ımportynyń aǵymdaǵy kórsetkishteri áli de joǵary bolyp otyr», dedi M. Kópeı.