Kabýldaǵy shabýylǵa BUU Qaýipsizdik Keńesiniń otyrysy sebep bolýy múmkin - QR SІM

ASTANA. QazAqparat - QR Syrtqy ister vıtse-mınıstri Erjan Ashyqbaev Kabýldaǵy teraktqa baılanysty pikirin bildirdi, dep habarlaıdy «QazAqparat» HAA tilshisi.

«Atalǵan taqyrypty talqylaý (Aýǵanstandaǵy jaǵdaıdy turaqtandyrý - avt.) nemese BUU Qaýipsizdik Keńesiniń otyrysy Kabýldaǵy shabýylǵa sebep boldy degendi boljamdy syzyp tastaýǵa bolmaıdy», - dedi Erjan Ashyqbaev tilshilerdiń suraǵyna jaýap bere otyryp.

Onyń aıtýynsha, lańkester ózderin jarnamalaý úshin mundaı múmkindikti paıdalanǵan bolýy múmkin. Sonymen qatar, Ashyqbaev Aýǵanstandaǵy ahýaldy retke keltirý baǵytynda AQSh-ty qoldaıtynyn jáne aýǵan jastary úshin sapaly bilim alýda bizdiń eldiń mańyzdylyǵyna toqtaldy.

«AQSh óz tarapy Aýǵanstandaǵy ahýaldy retke keltirýde mańyzdy úlesin qosyp keledi. Qazaqstan Aýǵanstandaǵy ahýaldy retke keltirý boıynsha AQSh ákimshiliginiń jańa ádisin tolyq qoldap, Qazaqstannyń bilim baǵdarlamasy aıasynda óte úlken áserin tıgizýde: myńǵa jýyq aýǵan jastary beıbit baǵyttaǵy mamandyqtardy ıgerýde. 500-ge jýyǵy óz eline qaıtyp oralyp, beıbit ómirdi qalpyna keltirý protsesine atsalysyp jatyr», - deıdi Erjan Ashyqbaev.

QR Syrtqy ister vıtse-mınıstri sonymen birge, Aýǵanstandaǵy ahýal búkil Ortalyq Azııa elderine áserin tıgizetinin tilge tıek etti.

«Aýǵanstan - bizdiń kórshimiz. Ortalyq Azııa elderi arqyly biz bul memlekettiń qalaı áser etetinin baıqap otyrmyz. Aýǵanstandaǵy boljamdy turaqsyzdyq, qarbalastyqtyń birtindep údeýi Ortalyq Azııanyń ortaq klımatynda baıqalady. Sondyqtan, BUU Qaýipsizdik Keńesindegi alańda jáne Memleket basshysynyń resmı sapary aıasynda Aýǵanstanǵa jan-jaqty járdem berý qajettiligi aıtylǵan bolatyn», - deıdi ol.

Eske sala ketsek, Aýǵanstanda sodyrlardyń qonaqúıge shabýyly saldarynan Qazaqstan azamaty qaza bolǵan edi. Jaqyn kúnderi mert bolǵan azamattyń denesin Otanyna jetkizýdi uıymdastyrý boıynsha máseleler sheshiletin bolady.