Kabırhan Kóshpendiler oıynynda óner kórsetýi múmkin

<p>ASTANA. KAZINFORM &ndash; Ulttyq jáne at sporty túrleri ortalyǵynyń qoǵammen baılanys bóliminiń basshysy Qaıyrhan Máýlen Dúnıejúzilik kóshpendiler oıynynda qandaı tanymal sáıgúlikter keletinin aıtyp berdi.</p>

«Ulttyq quramada tek kókpar boıynsha 30-ǵa jýyq at ázirlenip jatyr. Onyń ishinde 24-i erteń keledi. Sol 24 attyń barlyǵynyń da ataqtary bar, búgingi kúnge deıin jeńisterge jetken. Álem chempıonatynda jeńgen Nurǵasqa sáıgúligi bar, onymen Qurmanbek Turǵanbek atty úkilegen úmitimiz óner kórsetedi. Odan bólek, Jumyrtuıaq, Sekret atty talaı báıgede top jarǵan attar kelýi yqtımal. Tipti Dýbaıdaǵy báıgede jeńiske jetken Kabırhandy bilesizder, Kabırhan keledi dep josparlanǵan», - dedi Q.Máýlen «Qazanat» ıppodromynda ótken baspasóz máslıhatynda.

Biraq spıkerdiń aıtýynsha, áli de aýa raıy men transportqa baılanysty ózgerister bolýy múmkin.

«Olar jeke adamdardyń attary bolǵandyqtan memlekettiń, ulttyq quramanyń quzyryndaǵy is emes. Sondyqtan osyndaı nıýanstar bar. Biraq elimizdiń atynan qatysatyn sáıgúlikterdiń bári óte jaqsy tańdalǵan jáne daıyndalǵan», - dedi ol.

Eske sala keteıik, jyl basynda qazaqstandyq sáıgúlik Kabırhan Dýbaıda ótken jarysta top jarǵan edi. Talaı sheteldikti tańdaı qaqtyrǵan tulpar Qazaqstannyń atyn álemge tanytty.

5-shi Dúnıejúzilik kóshpendiler oıyndary Astana qalasynda 8-13 qyrkúıek aralyǵynda ótedi. Álemdik dodaǵa 89 elden 2800-ge jýyq qatysýshy keledi dep josparlanyp otyr. Onda sporttyń 21 túri boıynsha 97 medal jıyntyǵy sarapqa salynbaq.

Uıymdastyrý dırektsııasy shetel sportshylaryna at úlestiredi. Tek kórshi Reseı, Ózbekstan jáne Qyrǵyzstan sportshylary ǵana óz attarymen keledi.