Qabyrǵasy úgitildi: Aqtóbeniń munaıly aýylyndaǵy turǵyndar úıdi jóndep berýdi surady

<p>AQTÓBE. KAZINFORM &ndash; Aqtóbe oblysy Temir aýdany Keńqııaq aýylyndaǵy eki qabatty úıdiń turǵyndary jańbyrda sýy sorǵalaıtyn baspanasyn jóndep berýdi surap otyr. Bul aýylda byltyr demeýshiler kómegimen qurylys jumysy júrgizilgen.</p>

Keńqııaq aýylynyń turǵyny Saǵyn Qaraǵulov № 39 úıde turady. Onyń aıtýynsha, bıyl jańbyr jaýǵan kezde tamshy aǵyp, eki qabatty úıdi túgel búldirgen. Sonymen birge qabyrǵasy da qısaıyp, qulap tur. 

— Eki qabatty úıdiń ekinshi qabatynda turamyn. Biz úıimizdiń jóndelgenin qalaımyz. Óz kúshimizben jóndeı almaımyz, ári byltyrdan bastap demeýshilerdiń kómegimen jóndegen soń bizdiń úıimizdi de tizimge qosý kerek. Úıdiń qabyrǵasy sógitilip tur edi. Ótken-ketken adamnyń basyna túsip, mertiktirmes úshin qulatyp jiberdim. Turǵyndardyń muny jóndeýge kúshi jetpeıdi, — dedi Saǵyn Qaraǵulov. 

Keńqııaq aýylynda byltyr úsh úı jóndeldi. Ol úılerdiń shatyry jabylyp, qabyrǵasy qaptaldy. Bul munaı kompanııasynyń demeýshiligimen atqarylǵan jumys. 

— «SNPS-Aqtóbemunaıgaz» AQ-y oblys ákimdigimen kelisim aıasynda byltyr 11 úıdi jóndeýge kelisti. Sol 11 úıdi jóndeý merzimi naqty aıtylmady. Ótken jyly 15, 16, 17 úıler, ıaǵnı, úsheýi jóndeldi. Tóbesin jaýyp, syrtyn qaptap berdi. Kelisim boıynsha ózge úılerdi bıyl jalǵastyrady. Biraq kóktemgi sý tasqyny kezinde kompanııanyń ken oryndary úsh aı sýda qalyp, tabysy túsken. «SNPS-Aqtóbemunaıgaz» AQ-nyń ókilimen sóılestim. Olar Qytaıdaǵy ınvestorlardan qarjy suratyp jatqanyn aıtty. Qazir jóndeıtin úıdiń shyǵyny, qajettiligin kelip tekserip, qarap jatyr. Taıaýda jańbyr bolyp, biraz úıdiń tóbesinen sý aqty. Sol kezde ózge úılerdiń de turǵyndary ótinish aıtty. Bıyl jóndeletin úsh úıdiń qataryna bári kirgisi keledi. Al aýylda 38 úı bar. Onyń kóbisiniń jaǵdaıy nashar. Kezinde «Termojańǵyrtý» baǵdarlamasyna da kelispegen eken. Negizi turǵyndar birigip, ózderi jóndeýi kerek, — dedi Keńqııaq aýyldyq okrýginiń ákimi Qýanyshbek Serikjanov. 

Keńqııaq aýylyndaǵy úıler 1960 jyldary salynǵan. Sodan beri eshkim kúrdeli jóndeý jumystaryn júrgizbedi.

— Qazirgi kezde kásipkerlermen kelisim jasap jatyrmyz. Turǵyndarmen kezdestirip, bank arqyly úshjaqty kelisimshartqa qol jetkizgimiz keledi. Sol kezde bólip tóleýge kelise alady. Jóndeý retin tańdaý turǵyndar enshisinde bolady. Úıler apatty dep tanylmaǵan, biraq jaǵdaıy nashar. Keıbir úıde adamdar páter jaldap turady. Keıbiriniń ıeleri múlde turmaıdy, jabyq tur páteri. Olar ózi turmaǵan soń kelispeýi de múmkin. Bul bıyl emes, jyldar boıy kóterilip kele jatqan másele, — dedi Qýanyshbek Serikjanov.

Vıdeo: Saǵyn Qaraǵulov