Kabınetteri sýyq Petropavl mektebi jylý úrlegish paıdalanýǵa májbúr

PETROPAVL. QazAqparat – Aıazǵa shydas bermegen Petropavldaǵy jańa bilim ordasy – M.Jumabaev atyndaǵy ІT mektep-lıtseıdiń kabınetteri jylý úrlegish quraldarmen jylytyla bastady, dep habarlaıdy QazAqparat tilshisi.

Byltyr ǵana paıdalanýǵa berilgen mekteptegi jaǵdaımen Soltústik Qazaqstan oblysy Bilim salasynda sapany qamtamasyz etý departamentiniń jańa basshysy Alena Malgaeva baryp tanysty.

Departamenttiń málimetinshe, Petropavl bilim bólimi jáne mektep ákimshiligi synyp bólmelerindegi temperatýrany qalypqa keltirý úshin birqatar sharany qolǵa aldy. Qazirgi ýaqytta merdiger kompanııa kepildik merzimi ótpegendikten óz esebinen olqylyqtardy joıyp jatyr. Terezedegi shuryq-tesikterdi bitep, jeldetý júıesin jónge keltirdi.

Mekteptiń jylý torabynyń jumysyna taldaý júrgizildi, kórsetkishter qalypty. Jylytý júıesine neǵurlym qýatty sorǵyny satyp alý týraly sheshim qabyldandy. Bastaýysh synyp oqýshylary oqıtyn korpýsqa jylý úrlegish qondyrǵylar ýaqytsha qoıyldy. Bul sharalar kabınetterdegi temperatýrany 20-22 gradýsqa deıin kóterýge múmkindik berdi. Balalar shtattyq rejımde bilim alyp jatyr. Másele tıisti qurylymdardyń turaqty baqylaýynda», - dep habarlady departamenttegiler.

Mektep oqýshylarynyń ata-analary synyptardyń sýyqtyǵyna áleýmettik jelide shaǵymdanǵannan keıin bul jaǵdaıdy SQO-nyń sybaılas jemqorlyqqa qarsy qyzmeti baqylaýǵa aldy. Olar synyptardaǵy temperatýranyń 15 gradýs qana ekenin rastady.

Buǵan deıin SQO Qyzyljar aýdany Beskól aýylynyń mektebi synyptardyń sýyq bolýyna baılanysty úsh aýysymǵa aýystyrylǵanyn jazǵan edik.