Kabel-sym ónimderine ýtılızatsııalyq alym alý merzimi 2023 jylǵy 1 qańtarǵa deıin shegerildi

NUR-SULTAN. QazAqparat - Qazirgi ýaqytta QR ekologııa, geologııa jáne tabıǵı resýrstar, ındýstrııa jáne ınfraqurylymdyq damý mınıstrlikteri kabel-sym ónimderine ýtılızatsııalyq alym alý merzimin 2023 jylǵy 1 qańtarǵa deıin shegerý boıynsha jumys júrgizýde. Bul týraly QR ekologııa, geologııa jáne tabıǵı resýrstar mınıstri Serikqalı Brekeshev málim etti, dep habarlaıdy QazAqparat primeminister.kz saıtyna silteme jasap.

Memleket basshysy Q. Toqaevtyń ýtılızatsııalyq alym alýmen memlekettik uıym aınalysýy tıis degen tapsyrmasyn oryndaý úshin Úkimet tıisti qaýly qabyldady. Osy qaýlymen «ÓKM Operatory» JShS-nyń jarǵylyq kapıtalyna júz paıyz qatysý úlesi memleket menshigine qabyldanǵany aıqyndaldy.

Mınıstr habarlaǵandaı, óndirýshilerdiń (ımporttaýshylardyń) keńeıtilgen mindettemeleriniń jańa operatory retinde memlekettiń 100% qatysýymen «Jasyl Damý» AQ anyqtaldy. Jarǵylyq kapıtalda AQ-nyń basqa menshik ıeleri joq. Ýtılızatsııalyq alym mólsherlemelerin qaıta qaraý úshin Vedomstvoaralyq jumys toby quryldy, oǵan jurtshylyq, bıznes jáne múddeli memlekettik organdardyń ókilderi kirdi. «27 qańtarda kabel-sym ónimderine ýtılızatsııalyq alym mólsherlemelerin (koeffıtsıentterin) qaıta qaraý máselesi talqylandy. Jumys tobynyń músheleri qazirgi ýaqytta QR ekologııa, geologııa jáne tabıǵı resýrstar, ındýstrııa jáne ınfraqurylymdyq damý mınıstrlikteri kabel-sym ónimderine ýtılızatsııalyq alym alý merzimin 2023 jylǵy 1 qańtarǵa deıin shegerý boıynsha jumys júrgizip jatqanyn habarlady», – dedi S. Brekeshev. Bul sheshim kabel-sym ónimderin ımporttaýshylarmen jáne óndirýshilermen talqylaý kezinde qabyldandy.

« Atameken» UKP qorytyndysynda ýtılızatsııalyq tólemdi yntalandyrý erejeleri men esepteý ádistemesine túzetýler usynyldy. Ekologııa mınıstrligi tıisti buıryq jobasyn ázirledi, ol memlekettik organdarmen kelisilý satysynda.