Qabanbaıdyń 329 jyldyǵy: ShQO-da respýblıkalyq konferentsııa ótti

ÓSKEMEN. QazAqparat – Jońǵar basqynshylarymen ult-azattyq kúreske qatysqan qazaqtyń qaısar qolbasshysy Qarakereı Qabanbaıdyń keler jyly 330 jyldyq mereıtoıy atalyp ótilmek. Soǵan oraı Shyǵys Qazaqstan oblysynda alǵashqy respýblıkalyq ǵylymı-praktıkalyq konferentsııa ótti, dep habarlaıdy QazAqparat tilshisi.

Shara Óskemendegi Qabanbaı batyr eskertkishine gúl shoqtaryn qoıý rásiminen bastaldy. Sodan soń Uly qolbasshynyń ómiri men qazaq halqynyń órkendeýine qosqan jeńisteri týraly A.S. Pýshkın atyndaǵy oblystyq kitaphana uıymdastyrǵan jyljymaly kórme ótti.

Birinshi ǵylymı-tájirıbelik konferentsııaǵa S.Amanjolov atyndaǵy ShQÝ-dyń professorlyq-oqytýshylyq quramy, QR BǴM Memleket tarıhy ınstıtýtynyń jetekshi ǵylymı qyzmetkeri Qanat Esenov, Oralhan Bókeı atyndaǵy №44 lıtseıdiń dırektory Jańyl Nazarbaeva men óńir tarıhshylary qatysty. Konferentsııany quttyqtaý sózimen «Qabanbaı» halyqaralyq qorynyń jáne «Er-Qaptaǵaı» respýblıkalyq qoǵamdyq birlestiginiń tóraǵasy Qusman Shalabaev ashty.

«Shyǵys Qazaqstan oblysyna kórsetken qoldaýy men kómegi úshin zor alǵysymdy bildiremin. Bul is-sharamyz el Táýelsizdiginiń 30 jyldyǵy aıasynda ótkizilip otyr. Kelesi jyly Qabanbaı batyrdyń 330 jyldyq mereıtoıyn aýqymdy túrde el bolyp atap ótýdi josparlap otyrmyz. Birinshi kezekte biz jastarymyzdyń osyndaı batyrlardyń, ata-babalarymyzdyń róli men tarıhymyzdaǵy mańyzdy ornyn tereń túsingenin qalaımyz. Uly qolbasshynyń ómirindegi kóptegen tarıhı oqıǵalar men faktiler áli zerttelgen joq. Tarıhshylarmen birlesip osynyń bárin qamtyǵymyz keledi. Joǵary deńgeıde mádenı, sporttyq jáne ǵylymı is-sharalar ótkizemiz degen josparymyz bar», - dedi Qusman Shalabaev

Alǵashqylardyń biri bolyp S.Amanjolov atyndaǵy ShQÝ Qazaqstan tarıhy kafedrasynyń senor-lektorlary, tarıh ǵylymdarynyń kandıdattary Roza Cheketaeva men Maratbek Aqanov baıandama jasady. Professorlar ǵasyrlar boıǵy armany men qazaq halqynyń basty qundylyǵy – Táýelsizdik tarıhyndaǵy batyrdyń orny týraly, sondaı-aq Uly qolbasshy jaıly shynaıy ańyzdar týraly aıtyp berdi. Odan ári Semeı qalasynyń Shákárim atyndaǵy ýnıversıtetiniń professory Muhtarbek Kárimov «Aýyzsha jáne jazbasha derekterdegi Qabanbaı batyrdyń tulǵasy» taqyrybyna toqtaldy. Aıagóz shaıqasynyń tarıhı-tanymdyq ekspedıtsııasynyń qorytyndylary týraly QR BǴM Memleket tarıhy ınstıtýtynyń jetekshi ǵylymı qyzmetkeri Qanat Esenov baıandady.