Qabanbaı batyrdyń qyzy kim?
XVIII ǵasyrdyń ortasyna qaraı (1745 j.) jońǵar qontaıshysy Qaldan Seren ólip, jońǵarlardyń óz ishinde taq talasy bastalady. Osy jaǵdaıdy utymdy paıdalanǵan Abylaı Túrkistan men Syr boıyndaǵy qalalardy azat etýdi aldyna maqsat etip qoıady. Abylaı sol joryqtardyń birinde qazaq áskerlerin úsh topqa bóledi. Onyń birinshi tobyn Qanjyǵaly Bógenbaı basqarady. Ol Sozaq bekinisine baryp bekinýge tıis bolady. Ekinshi qoldy Jánibek batyr basqarady. Ol Syrdarııanyń tómengi saǵasyna qaraı bet túzeıdi. Úshinshi negizgi qoldy Abylaıdyń ózi basqarady. Jońǵarlar tarapynan Qaldan Serenniń ortanshy uly, taq murageri bolǵan Tseven Dorjy shyǵady. Ol óziniń aýyr qolymen Abylaı áskerlerinen buryn kelip, bekinip alady. Abylaı Jańaqorǵandy alýdy Qabanbaıǵa tapsyrady. Zeńbirek olarǵa qarsy oq jaýdyryp, júzdegen sarbaz qyrylady. Amalsyz Abylaıdyń qoly keıin sheginedi.
Qandaı áreket jasaryn bilmeı abdyrap turǵanda, qazaq jasaqtarynyń oń jaq tusynan Tseven Dorjy turǵan tóbege qaraı basynda úkili kámshat bórki bar, aq boz atty bir qyz bala «Qabanbaı! Qabanbaı!» dep uran tastap, sýyrylyp shyǵady. Qyzdyń qolynda ne naıza, ne soıyly joq, bar bolǵany qamshy ǵana. Muny kórgen qalyń qol shydaı almaı lap qoıyp, «Abylaı! Aq jol! Qabanbaı! Abylaı!» dep aıqaılap, zeńbirekshilerdiń túıesin taptap ótedi. Tseven Dorjynyń qolyn talqandap, jeńispen oralǵan Abylaı manaǵy qalmaqtarǵa qarsy shaýyp, jeńiske jol salǵan qyzdy izdestiredi.
Bul Qabanbaı batyr men onyń zaıyby, qazaqtyń batyr qyzy Gaýhardan týǵan jas Nazym eken. Búldirshindeı qyzdyń osynshama erligine dán rıza bolǵan Abylaı belindegi som altynnan soǵylǵan belbeýin sheship, qyzǵa syılapty. Abylaıdyń jońǵarlardy tolyq talqandaýyna jol salǵan jeńisi sol Nazymnyń atymen baılanysty bolǵan.