Q.Jubanov 16 til bilgen eken

ASTANA. QazAqparat - Qazaqtyń til bilimi salasyndaǵy alǵashqy professor, túrkitanýshy, pedagog Qudaıbergen Jubanov 16 til bilgen eken. Bastapqyda meshitten dáris alyp arab tilin úırengen ol keıin parsy, orys, mońǵol, chývash, komı, gúrji, latyn, túrik, japon, frantsýz, aǵylshyn jáne nemis tilderin de jetik meńgergen. Bul týraly búgin «Qudaıbergen Jubanov murasy jáne túrkitanýdyń ózekti máseleleri» atty ǵylymı-praktıkalyq dóńgelek ústel barysynda ǵalymnyń uly Asqar Jubanov málimdedi.

Eske salaıyq, Halyqaralyq Túrki akademııasynyń uıymdastyrýymen qazaq til biliminiń ǵylymı-teorııalyq negizin salýshylardyń biri, kórnekti ǵalym Qudaıbergen Jubanovtyń týǵanyna 115 jyl tolýyna oraı ótkizilgen sharaǵa Qazaqstan, Túrkııa men Qyrǵyz eliniń ǵalymdary, memleket jáne qoǵam qaıratkerleri men Q.Jubanovtyń urpaqtary qatysty. «Ákemiz nebári 38 jyl ómir súrdi, óte erte ketti. Sonyń ózinde tabıǵattyń bergen darynynyń arqasynda artynda óshpes mol mura qaldyrdy. Ol qazaq tiliniń barlyq salasyna eńbek sińirdi. Bir tańqalarlyǵy, ákemiz on alty til bilgen eken. Sonyń arqasynda eýropa, túrik tilderin salystyrmaly zertteý arqyly qazaq tiliniń grammatıkasyn jasady. Sóıtip qazaq tiliniń teorııalyq negizin qalady», - deıdi A.Baıtursynuly atyndaǵy til bilimi ınstıtýtynyń professory Asqar Jubanov.

Bul rette professor keıingi jastar Jubanov muralaryn zerttep, onyń izin jalǵastyryp júrgenin, eń bastysy ǵalym murasy jańa kózqaras turǵysynan qarala bastaǵanyn alǵa tartady.

«Halyqaralyq Túrki akademııasy muryndyq bolǵan bul jıyn bıyl ótkizilip otyrǵan eń alǵashqy mereıtoılyq shara. Jyl saıyn «Jubanov taǵylymy», «Jubanovtaný» atty dástúrli oqýlar, jıyndar ótkizilip turady. Endi elimizdiń bas qalasy Astananyń kósheleriniń birine ákemizdiń esimi berilse degen tilek bar. Bul jalpy Jubanovtar áýletiniń tilegi», - deıdi ǵalym urpaǵynyń biri Qyzǵaldaq Jubanova.