Q.Turǵanqulov: Úgit jumystary zań aıasynda júrgizilýde

ASTANA. QazAqparat - QR Prezıdenti saılaýynyń úgit-nasıhat jumystary zań aıasynda júrgizilýde. Bul týraly búgin Ýkraına Ortalyq saılaý komıssııasynyń tóraǵasy Mıhaıl Ohendovskıımen kezdesken QR Ortalyq saılaý komıssııasynyń tóraǵasy Qýandyq Turǵanqulov aıtty.

«Bizde ótetin saılaýǵa sizderdiń kásibı kózqarastaryńyz ben qorytyndylaryńyz qyzyqty. Saılaý naýqanynyń barlyq kezeńderin aıaqtaýǵa jaqyndap qaldyq. Búgin úgit jumystarynyń sońǵy kúni»,- dedi Q.Turǵanqulov kezdesý barysynda.

Sonymen qatar ol saılaýshynyń saılaý ýchaskesine kelgen kezde aty-jónin tappaı qalýyna baılanysty problemalardyń týyndaǵanyn, degenmen, ony Halyqqa qyzmet kórsetý ortalyqtaryn tartý arqyly sheshilgenin atap ótti.

«Bul saılaý naýqanynyń ereksheligi úgit jumystary belsendi júrgizilýde. Biz ony barynsha tyńǵylyqty baqylaýda ustap otyrmyz. Barlyq kandıdattarǵa teń basymdyq berilgen. Saılaý naýqany barysynda saılaý protsesine qatysýshylardyń quqyǵyn buzatyn jaıtarǵa baılanysty aıtarlyqtaı shaǵymdar bolmady. Bizge 94 ótinish kelip tústi. Onyń 47-si ǵana saılaý máselelerine qatysty boldy. Kúrdeli máseleler kóterile qoıǵan joq. Bul turǵydan alyp qaraǵanda, biz úgit naýqany zań aıasynda júrgizilýde dep sanaımyz», - dedi Q.Turǵanqulov.