Q.Turǵanqulov EQYU/DIAQB mıssııasyna saılaýdy baıqaý jónindegi jumystaryna alǵys bildirdi

ASTANA. QazAqparat - 28 naýryzda QR Ortalyq saılaý komıssııasynyń tóraǵasy Q.Turǵanqulov QR Parlamenti Májilisi depýtattarynyń kezekten tys saılaýyn baıqaý jónindegi EQYU/DIAQB mıssııasynyń basshysy Borıs Frlets myrzamen kezdesti. Bul týraly OSK baspasóz qyzmeti habarlady.

«Kezdesýge EQYU/DIAQB mıssııasy basshysynyń orynbasary Polın Marııa Lemos, QR OSK músheleri, sondaı-aq EQYU/DIAQB-nyń saılaý jáne quqyq máseleleri jónindegi mamandary qatysty», delingen habarlamada.

Ortsaılaýkom basshysy Frlets myrzaǵa EQYU/DIAQB mıssııasynyń Parlament Májilisi saılaýyn baıqaý jónindegi jumysyna, sondaı-aq usynǵan usynymdary úshin alǵys bildirdi.

«Biz EQYU/DIAQB-nyń Aldyn ala tujyrymdar men qorytyndylar týraly málimdemesimen muqııat tanysyp shyqtyq. Biz Mıssııanyń saılaýdy uıymdastyrýshylardyń adal jumysyn joǵary baǵalaǵanyna qýanyshtymyz. Tutastaı alǵanda, saılaý jarııaly ári ashyq, elimizdiń saılaý zańnamasynyń normalaryna jáne demokratııalyq saılaýdyń jalpyǵa tanymal qaǵıdattaryna tolyǵymen sáıkes ótti dep esepteımiz. Halyqaralyq, onyń ishinde EQYU elderinen kelgen baıqaýshylar men sarapshylardyń basym kópshiligi saılaýdy demokratııalyq qaǵıdattarǵa sáıkes dep tanydy. Otandyq baıqaýshylar men bedeldi halyqaralyq uıymdardyń ókilderi de osyndaı pikirde» - dep atap ótti Q. Turǵanqulov.

EQYU/DIAQB mıssııasynyń basshysy óz kezeginde QR OSK tarapynan kezdesý uıymdastyrylǵanyna, sondaı-aq kórsetilgen kómek pen yntymaqtastyq úshin rızashylyǵyn bildirdi.

Frlets myrza Q.Turǵanqulovtyń «saılaý naýqany barysynda saılaý qorytyndylaryna yqpal etýi múmkin saılaý týraly zańdy óreskel buzýshylyqtar bolmady» degen pikirimen kelisetinin bildirdi.

Kezdesýde EQYU/DIAQB men QR OSK sarapshylarynyń ózara is-qımylyn uıymdastyrýǵa baılanysty máseleler talqylandy.

«EQYU/DIAQB mıssııasymen yntymaqtastyq aıasyndaǵy oń tájirıbeni eskere otyryp, biz elektorattyq naýqan jónindegi óz pikirimizdi jetkizý úshin EQYU/DIAQB sarapshylarymen tyǵyz qarym-qatynasta jumys isteýge daıyn ekenimizdi bildiremiz, bizdiń pikirimizge qulaq asyp, eskeretinderińizge senim bildiremiz» - dep atap ótti Q.Turǵanqulov.

Kezdesý sońynda Q. Turǵanqulov «Biz EQYU/DIAQB mıssııasynyń barlyq sarapshylaryna júrgizgen jumysy úshin alǵysymyzdy aıtamyz jáne budan ári tabysty yntymaqtastyqta bolatynymyzǵa senim bildiremiz» - dedi.