Q.Toqaev Mıýnhen qaýipsizdik konferentsııasynda sóz sóıledi
Bul bedeldi forýmnyń bıylǵy kún tártibi transatlantıkalyq qatynastardyń keleshegi men NATO, sondaı-aq qaýipsizdik pen qorǵanys salasyndaǵy halyqaralyq yntymaqtastyq tóńireginde boldy. Shara aıasynda Batys pen Reseıdiń ózara qarym-qatynastary, Sırııadaǵy soǵys, Azııa-Tynyq muhıty aımaǵyndaǵy ahýal jáne basqa da taqyryptar boıynsha pikirsaıys órbidi.
Konferentsııaǵa 600-den astam meımandar, onyń ishinde 30 eldiń memleket jáne úkimet basshylary, parlamentter tóraǵalary, bedeldi saıasatkerler, dıplomattar, áskerıler men sarapshylar qatysty. Germanııa Kantsleri Angela Merkel, BUU Bas Hatshysy Antonıo Gýterrısh, AQSh-tyń vıtse-prezıdenti Maık Pens, NATO Bas Hatshysy Iens Stoltenbergtiń sózderi erekshe yqylas týǵyzdy.
Qazaqstan Senatynyń Tóraǵasy «Eýrazııadaǵy syný syzyqtary» taqyryby boıynsha paneldik pikirsaıysqa qatysty. Q.Toqaev óz sózinde aımaqtaǵy memleketter arasynda boljaldy jáne dostyq qatynastar qalyptastyrýdyń mańyzdylyǵyn atap ótti. Tóraǵa Qazaqstannyń shektesetin eldermen aýmaqtyq máseleleri joq ekenin, óıtkeni álemdegi qurlyqtaǵy eń uzaq shekara - Qazaqstan men Reseı arasyndaǵyny qosa eseptegende barlyq eldermen memlekettik shekara delımıtatsııalanǵanyn aıtty.
Q.Toqaev Qytaıdyń «Bir beldeý, Bir jol» tujyrymy aımaqtyq ekonomıkalyq yntymaqtastyqqa, onyń ishinde tranzıttik áleýettiń arta túsýine jáne Eýrazııa elderinde jańa ónerkásip qýattaryn qalyptastyrý úshin aýqymdy múmkindikter ashatynyna toqtaldy. Tóraǵa bul tizbekte Reseı mańyzdy ról atqarady dep sanaıdy.
Senat Tóraǵasy Prezıdent N.Nazarbaevtyń basshylyǵymen júzege asyp jatqan reformalarǵa egjeı-tegjeıli toqtaldy. «Qazaqstan reformashyl memleket bolyp tabylady. Biz ekonomıka nemese saıasat salasy bolsyn, bizdiń qoǵamnyń transformatsııalanýyn toqtatýǵa bolmaıtynyna kámil senemiz. Qazaqstan álemdegi eń damyǵan otyz eldiń qataryna ilgerileý úshin qandaı jaǵdaı bolsa da qurylymdyq reformalar jalǵasa berýi tıis», - dedi Q.Toqaev.
Tóraǵa sondaı-aq Birikken Ulttar Uıymy Qaýipsizdik Keńesiniń múshesi laýazymynda Qazaqstannyń basymdyqtary týraly da habardar etti. Ol ıadrolyq qarý men ıadrolyq materıaldardyń jaıylý máselelerin, ásirese olardyń terrorıstik uıymdar qolyna túsý qaýpine erekshe toqtaldy. Odan basqa, Q.Toqaevtyń aıtýynsha, Qazaqstan Azııadaǵy ózara senim jáne is-qımyl sharalary jónindegi keńesti nyǵaıta túsedi, sondaı-aq Shanhaı yntymaqtastyq uıymy aıasyndaǵy jumystardy údetýdi jalǵastyrady.
Sessııaǵa sonymen qatar Ázerbaıjan Prezıdenti Ilham Alıev, Estonııa Prezıdenti Kerstı Kalıýlaıd, Grýzııa Premer-mınıstri Georgıı Kvırıkashvılı jáne Ýkraınanyń burynǵy Premer-Mınıstri Arsenıı ıAtsenıýk qatysty. Pikirsaıysty «Eurasia Group» kompanııasynyń negizin salýshy ıAn Bremmer júrgizdi.