K.Saǵadıev: «Ómir ótkelderi» kitaby - taǵylymy óte mol ómir fılosofııasy

ASTANA. QazAqparat - QR Prezıdenti Nursultan Nazarbaevtyń «Ómir ótkelderi» kitaby - taǵylymy óte mol ómir fılosofııasy. Bul pikirdi búgin elordada atalǵan týyndynyń tusaýkeser rásimine arnalǵan saltanatty sharada akademık Kenjeǵalı Saǵadıev bildirdi.

«Bul tek qana ómirbaıan nemese ómirbaıan týraly suhbat emes. Bul oqýshynyń aldyna jaıylǵan taǵylymy óte mol ómir fılosofııasy der edim. Óıtkeni, Prezıdenttiń aıtqan ár sózinde jan-dúnıeńdi qozǵaıtyn tereń tolǵanys, oı jatyr», - dedi ol.

Akademık óz sózinde Elbasynyń «Bul kitapty elimizdiń bolashaǵyn qalaıtyn, jerimizdi aıalaıtyn, qorǵaıtyn jas qazaqstandyqtarǵa arnap áńgimelep shyqtym», degen sózin mysalǵa keltirip ótti. Sonymen birge ol Qazaqstan Prezıdentiniń taǵylymy mol, ónegeli ómir jolyn jastarymyzdyń oqyp-bilip júrgeni durys, degen oıyn bildirdi.

«Osy suhbat kitaby balalarymyzdyń, jastarymyzdyń patrıottyq sanasyn ósirýge óte qundy qural bolary eshqandaı kúmán týdyrmaıdy», - dedi K.Saǵadıev.