K. Másimov Nazarbaev Ýnıversıteti Bıznestiń joǵary mektebi jáne Memsaıasattyń joǵary mektebi ashylýynyń saltanatyna qatysty

ASTANA. QazAqparat - QR Premer-Mınıstri Kárim Másimov Nazarbaev Ýnıversıteti Bıznestiń joǵary mektebi (BJM) jáne Memlekettik saıasattyń joǵary mektebi (MSJM) ashylýynyń saltanatty rásimine qatysty.

Bul shara QR Tuńǵysh Prezıdenti kúni merekesine arnaldy, dep habarlaıdy primeminister.kz.

Úkimet basshysy joǵary oqý ornynyń jetekshiligin jáne stýdentterdi quttyqtaı kele, jańa ǵımarat yrǵaqty damý ústindegi Nazarbaev Ýnıversıtetiniń odan ári qanatyn keńge jaıýyna yqpal etetindigin jetkizdi.

«Ǵımarat pen jabdyqtar qazaqstandyq bilim berýdi jańa sapaǵa kótere almaıdy. Bul úshin bizge jetekshi professorlar, talantty jáne shyǵarmashyl stýdentter qajet. Sizderde bular jetip artylady degen senimdemin»,-dedi K. Másimov stýdentterge qarata aıtqan sózinde.

Sondaı-aq, saltanatty rásim barysynda Nazarbaev Ýnıversıteti men QR Syrtqy ister mınıstrligi arasynda, Nazarbaev Ýnıversıteti men QR Bilim jáne ǵylym mınıstrligi jáne QR ulttyq banki arasynda yntymaqtastyq jónindegi memorandýmdarǵa qol qoıyldy. Joǵary oqý ornynyń jańa ǵımaratynda aýqymdy is-sharalar, semınarlar jáne álemdik deńgeıde forýmdar ótkizýge múmkindik beretin keń dáris oqıtyn aýdıtorııalar, konferents-zaldar jáne vıdıekonferentsııa zaldary bar.

Ǵımarattyń jalpy aýmaǵy 19 000 sharshy metrdi alyp jatyr. Ǵımarat eki mekteptiń strategııalyq seriktesteri - Dıýk Ýnıversıtetiniń Fýkýa Bıznes Mektebi jáne Sıngapýr Ulttyq ýnıversıtetiniń Lı Kýan ıÝ atyndaǵy Memlekettik saıasat mektebiniń qatysýymen jobalanǵan.