Q. Mámı sot júıesindegi qujattardyń qazaqsha mátininde qate jibermeýdi tapsyrdy

ASTANA. QazAqparat - Búgin QR Joǵarǵy Sotynyń kezekti plenarlyq otyrysynda normatıvtik qaýlyny talqylaý kezinde osy Sottyń tóraǵasy Qaırat Mámı qujattardyń qazaqsha mátininde qate jibermeýdi júktedi.

Otyrys barysynda qujattardyń qazaqsha nusqasyndaǵy keıbir kemshilikter máselesi sóz boldy. Óz kezeginde Qaırat Mámı qujattar boıynsha qanshalyqty jumys jasalsa da, osyndaı qate jiberýge bolmaıtyndyǵyn, osy qujattardy qaraǵan sýdıalar kózge túsip turǵan qateni jibermeýge erekshe mán berýi tıis ekenin qadap aıtty.

«Osyndaı jaǵdaılar «árqaısymyzdyń ózimizdiń jumysymyz bar» degenniń jáne keıbireýlerdiń sot júıesine jany ashymaıtyndyǵynyń taǵy bir kórinisi. Gazetke nemese telearnaǵa shyqqan keı áriptesterimizdiń qazaq tiliniń jalǵyz qorǵaýshysy sekildi keýdesin soǵyp ketetini bar, al dál iske kelgende «árqaısyń ózderiń jóndep al» degenge saıady. Sondyqtan Joǵarǵy Sot barlyq sot júıesine úlgi bolýymyz kerek. Osy oraıda normatıvtik qaýlylardy qabyldap jatqanda bundaı selqostyqqa jol bermeý qajet», - dedi Joǵarǵy Sottyń tóraǵasy.

Bul turǵyda Q. Mámı atalǵan qaýlynyń qazaqsha mátini boıynsha qajet bolsa fılolog mamandardy tartý jóninde alqa tóraǵasyna tıisti tapsyrma berdi.

Aıta keteıik, búgingi otyrysta «Qylmystyq isterdi apellıatsııalyq tártippen qaraý tájirıbesi týraly» normatıvtik qaýlynyń jobasy jáne «Azamattardyń turǵy úılerdi jekeshelendirý jónindegi zańdardy sottardyń qoldaný tájirıbesi týraly» normatıvtik qaýlysynyń jobasy talqylandy.