Q.Qýanyshbaev atyndaǵy qazaq mýzykalyq drama teatry jańa maýsymyn ashady

NUR-SULTAN. QazAqparat - 14 jeltoqsan kúni Q.Qýanyshbaev atyndaǵy Memlekettik akademııalyq qazaq mýzykalyq drama teatry jańa XXX maýsymyn ashady. Maýsymashar QR Mádenıet jáne sport mınıstri Aqtoty Raıymqulova, Nur-Sultan qalasynyń ákimi Altaı Kólginovtiń qatysýymen ótedi, dep habarlaıdy óner ordasynyń baspasóz qyzmeti.

Otyz jyldyq tarıhy bar Q.Qýanyshbaev atyndaǵy Memlekettik akademııalyq qazaq mýzykalyq drama teatry jańa ǵımaratqa kóshti. Jańa ǵımarat elbasy N.Á.Nazarbaevtyń tapsyrmasymen salyndy. Qarasha aıynyń 26 kúni Nursultan Ábishuly teatr ǵımaratyna kelip, shyǵarmashylyq ujymmen kezdesti. Jańa ordadaǵy teatr maýsymy qalyptasqan dástúr boıynsha M.Áýezovtiń «Abaı» qoıylymymen ashylady. Qoıýshy rejısseri – Qazaqstannyń eńbek sińirgen qaıratkeri Á.Orazbekov.

Sońǵy jyldary álemde oryn alǵan jaǵdaılarǵa baılanysty adamzat balasy meıirimdilik, qaıyrymdylyq syndy áreketterge úlken mán berýde. Elimizde de qaıyrymdylyq salasyna jiti kóńil bólinip keledi. Halqymyz muqtaj adamǵa kómek kórsetip, qaıyrymdylyq jasaýdy, kiriptarǵa qaıyr berip, qarttardy aıalaýdy, muqtaj jandardy qoldap-qorǵaýdy árbir adamnyń adamgershilik boryshy dep esepteıdi. Sondyqtan qazirgi tańda memleket tarapynan da qaıyrymdylyqty qoldaýǵa kóp kóńil bólinip otyr. Qazaq teatr ujymy da alǵashqy ashylýyn osy baǵytta jarııalaǵandy jón sanady. Elorda tórinde araǵa 29 jyl salyp boı kótergen jańa qazaq drama teatry ǵımarattyń saltanatty ashylýy men mereıli XXX maýsymyn qaıyrymdylyq sharasymen bastaýdy maqsat etip otyr..

14-15-16 jeltoqsan kúnderi, saǵat:19.00-de Abaı Qunanbaıulynyń 175 jyldyq mereıtoıy aıasynda «Abaı» tragedııasynyń jańasha nusqasyn usynady.