Jibek Joly: «Jańa ýaqyttyń» jańa stýdııasynda Aqparat mınıstri suhbat berdi

ASTANA. QazAqparat – Jibek Joly telearnasynyń «Jańa ýaqyt» aqparattyq-saraptama baǵdarlamasy jańa stýdııadan aqparat tarata bastady. Zamanaýı tehnıkamen jabdyqtalǵan stýdııanyń alǵashqy qonaǵy – Aqparat jáne qoǵamdyq damý mınıstri Darhan Qydyráli, dep habarlaıdy QazAqparat tilshisi.

Jańa stýdııadaǵy suhbat barysynda sala basshysy mınıstrlik tarapynan jaqynda «Naýryz» baıqaýyn ótkizýge daıyndalyp jatqanyn atap ótip, vedomstvo janynan ashylǵan «MediaLab» ortalyǵynyń jumysy týraly aıtty.

«Naýryz – merekeler aıy, aldymyzda 8 naýryz – hanymdar merekesi kele jatyr. Osy oraıly sátte aıaýly arýlarymyzdy, qyz-kelinshekterdi kóktemniń kórkem merekesimen shyn júrekten quttyqtaımyn! Naýryz – túrki álemine, musylman álemine ortaq. Sondyqtan osy naýryz ataýyn brendke aınaldyrý úshin telehıkaıalardyń arnaıy baıqaýyn jarııaladyq. Bul buryn «Tumar» júldesiniń quramynda bolatyn. Qazir «Tumardan» alyp, jeke baıqaý retinde jarııalap otyrmyz. Ondaǵy maqsatymyz – otandyq teleserıaldar kontentin baıytý, olarǵa jańa serpin berý, Qazaqstandy aımaqtaǵy serıaldardyń jańa platformasyna aınaldyrý. Sońǵy jyldary elimizde túsirilgen serıaldardyń sapasy men sany artqany belgili. Sondyqtan «úzdik akter», «úzdik rejısser», «úzdik saýndtrek», «úzdik mýzyka» degen sııaqty túrli janrlar boıynsha úzdikterdi anyqtaıtyn bolamyz«, dedi mınıstr.

Onyń aıtýynsha, «MediaLab» jobasy da jyl basynda iske qosylǵan. «Alǵashqy jumysymyz – el óńirlerindegi baspasóz hatshylaryn jınap, ekikúndik semınar ótkizdik. Ekinshisi – «Elimizdegi jýrnalıstıka fakýltetterinde qalaı maman daıarlaný kerek?» degen taqyrypta jıyn ótkizdik. Aı saıyn turaqty túrde elimizdiń medıanaryǵyna qatysty sharalar ótip turady. Óıtkeni buǵan qajettilik bar. Zańmen birge medıasaýattyń da artýy óte mańyzdy. Aqparattyq soǵys, syn-qater kóbeıgen sátte bizdiń press-hatshylarymyz da halyqpen baılanysta kópir bolýy kerek», - dedi Darhan Qydyráli.

Sonymen birge mınıstr qoǵamda qyzý talqyǵa túsken «Mass-medıa týraly» zańǵa da toqtaldy.

«Munda bir emes, birneshe zań jobasy bar. Sonyń ishinde áýeli, «Aqparattyq doktrına» mańyzdy. Qazir Úkimet Qaýlysymen Prezıdent Ákimshiligine usynylǵan. Onda aqparat qaýipsizdigi, sóz bostandyǵy sııaqty negizgi uǵymdardy ashyp kórsetý kózdelgen.

Odan keıingi zań jobasy – «Mass-medıa týraly» zań. Mass-medıa uǵymynyń aýqymy keń, onyń ishine bári kiredi. Munda kóptegen jańalyqtar bar, qarjylandyrýdy ashyq kórsetý, sýbsıdııalaý, grant berý, jýrnalısterdiń jumysyn jeńildetý, otandyq kontentti qoldaý, aqparat keńistigin qorǵaý syndy maqsattarymyz bar. Ol boıynsha talqylaýlar áli bolady, zań jobasy Májiliske barady. Sonymen qatar aqparatqa qol jetkizýdi jeńildetý jóninde zań jobasy bar. Bul jýrnalısterge jaýap berý merzimin qysqartady, keshikken sheneýnikterge shara qoldanylady. Odan bólek ázirlengen zań jobasy – Onlaın platforma jáne onlaın jarnama jóninde. Bizdegi jarnama naryǵyn retteıtin, kóptegen jańalyqtar ákeletin, mysaly bloger degen kim, onyń jumys aýqymyn aıqyndaıtyn jańa zań jobasy bolmaq», - dedi spıker.

Sonymen birge Darhan Qydyráli jýyrda kúshine engen «Jastar saıasaty týraly» zań jóninde pikir bildirdi.

«Jastarǵa baılanysty kóp jańalyq bar. Birinshiden, jumyssyz jastardyń NEET kategorııasy aıqyndaldy. Mysaly buryn jastardyń aýylda qorasynda birneshe maly bolsa, jumyssyz dep eseptelmeıtin. Qazir ol 4 sanatpen aıqyndalady – oqýynan shyǵyp qalǵan jastar, úıde otyrǵan jastar, zııandy ádetke táýeldi jastar, ýaqytsha jumyssyzdar. Endi olardy jumyspen qamtý ındıkatory ákimderdiń KPI-yna áser etetin bolady. Jastar buryn 29 jasqa deıin baǵdarlamalardyń ıgiligin kórse, endi 35-ke deıin baspana máselesi, granttar sekildi túrli baǵdarlamalarǵa qatysa alady», - dedi Aqparat mınıstri.