Jibek Joly telearnasy aǵylshyn tilinde jańalyqtar tarata bastady

ASTANA. QazAqparat – Jibek Joly telearnasy halyqaralyq jelisiniń («QR Prezıdentiniń Teleradıokesheni» KEAQ qurylymyna kiredi) jańalyqtary jańa formatta efırge shyqty, dep habarlaıdy QazAqparat tilshisi.

Ádettegi sıýjetti aqparat daıdjesteriniń ornyna endi kásibı aǵylshyn tildi júrgizýshiler keldi. Sonymen qatar arna óziniń basty ereksheligi – kóptildilikti saqtap otyr.

Kórermender burynǵydaı aǵylshyn tilindegi túpnusqadan bólek, qazaq, orys, qyrǵyz jáne ózbek tilderindegi aýdıotrekterdiń arasynda teledıdar kórý tilin tańdaı alady.

Jańartylǵan jańalyqtar ýaqyty ózgerdi, arnanyń astanalyq stýdııasynan kúnine 6 ret (15:00, 18:00, 21:00, 00:00, 03:00, 06:00) shyǵady.

Kúnniń birinshi jartysyndaǵy jedel jańalyqtar «Basty jańalyqtar» aıdarymen saǵat 12:00, 13:00 jáne 14:00-de jańartylady.

Jańalyqtar baǵdarlamalasy Jibek Joly arnasynyń sıgnaly qoljetimdi shet elderdiń praım-taımyna beıimdelgen.

Búginde arnanyń kórermeni - tórt qurlyqtaǵy 120-dan astam eldiń turǵyndary.

Telearna 2002 jyldyń 25 qazanynda Caspionet brendimen habar tarata bastady. Sońǵy jyldary ol tek sheteldik aýdıtorııaǵa arnaldy. Arna mazmuny - 100% qazaqstandyq ónim.

Baǵdarlamalar birneshe taqyryptyq baǵyttar boıynsha usynylǵan:

1) saıasat jáne aımaqtyq baǵyt;

2) ekonomıka, bıznes jáne ınvestıtsııalar;

3) týrızm jáne saıahat;

4) qoǵam, adamdar jáne tulǵalar;

5) mádenıet, dástúr jáne tarıh.

Jibek Joly aptasyna 7 kún, 24 saǵat 5 tilde habar taratady.