Jibek joly telearnasynyń jobasy - «Tumar-2024» syılyǵynyń ıegeri
Joba avtory Janar Baısemiz sheteldikter asyrap alǵan qazaqtyń jetim balalarynyń taǵdyry men tanymyn biraz jyldar boıy zerttep keledi. Belgili joba «Jibek Joly» telearnasynan alǵash ret 2022 jyly qazan aıynda kórermenge jol tartqan bolatyn. Sodan beri shyǵarmashylyq top týǵan elden jyraqqa ketken balalardy álemniń ár túkpirinen taýyp, qazaq kórermenine tanystyryp keledi. Jobanyń ekinshi maýsymy Amerıkanyń 13 shtatynda túsirildi. 18 bólimnen turady.
«2023-te Eýropa memleketterinen, odan keıin 2024-te sol Amerıka Qurama Shtattarynan túsirip keldik. Eýropa memleketterinen on eki, Amerıka Qurama Shtattarynan on segiz baǵdarlama shyqty. Úshinshi maýsym áli jalǵasqan joq. Biraq sol baǵdarlamaǵa túsken balalardyń ata-analaryn taýyp berip jatyrmyz. Aldy Qazaqstanǵa kelip, týǵan-týystarymen kezdesti. Eń birinshi Prezıdent teleradıo kesheniniń basshylyǵyna jáne Jibek joly arnasynyń basshylyǵyna alǵys aıtqym keledi. Jalpy ujymǵa rahmet. Óıtkeni bul - óte kúrdeli baǵdarlama. Adam taǵdyry. Halyqtyń yqylasyna bólendi. Ózimniń komandama, baǵdarlamaǵa úlesin qosqan barlyq adamǵa alǵysymdy bildirem», - dedi Janar Baısemiz sózinde.
Aıta keteıik, bıyl «Tumar» telebáıgesine 300 ótinim qabyldanyp, 48 teleónim nomınanttar tizimine engen. Úmitkerler 12 nomınatsııa boıynsha baq synasty. Jeńimpazdarǵa jyldaǵy dástúr boıynsha qazaqstandyq televızııany damytýǵa qosqan úlesi úshin Tumar músinshesi jáne 1 mıllıon teńge kólemindegi syıaqy tabystaldy.
Sonymen, jeńimpazdar tómendegideı:
Tótenshe jaǵdaı kezinde túsirilgen úzdik reportaj» – «Alapat tasqyn» – «Qazaqstan» telearnasy
Úzdik jýrnalıstik zertteý – «Ekonomıka vs ekologııa: sý únemdeýdiń joldary qandaı?/Arnaıy reportaj» – «Atameken Business» telearnasy
Úzdik aqparattyq baǵdarlama – «Astana Times» jańalyqtar qyzmeti – «Astana TV» telearnasy
Úzdik analıtıkalyq baǵdarlama – «Jeti kún» – «Habar» telearnasy
Úzdik áleýmettik joba – «Qudaıy qonaq» – «Qyzylorda» telearnasy
Úzdik derekti fılm – «Sheteldegi qazaq balalary» – «Jibek Joly TV» telearnasy
Úzdik telehıkııa – «Moshennıkı» – «NTK» telearnasy
Úzdik óńirlik tok-shoý – «Dilmar» – «Jetisý» telearnasy
Úzdik óńirlik telearna – «TDK-42» telearnasy
Balalarǵa arnalǵan úzdik baǵdarlama – «AýylDone» – «Jetinshi arna»
Úzdik telejýrnalıst – Grıgorıı Bedenko – «Habar» telearnasy
Úzdik telejúrgizýshi – Madına Balǵabaeva – «KTK» telearnasy
Budan bólek, Qazaqstan Respýblıkasy Prezıdentiniń keńesshisi – Baspasóz hatshysy Berik Ýálı «Qazsport» telearnasyna «Tumar-2024» arnaıy júldesin tabys etti. QR Mádenıet jáne aqparat mınıstri Aıda Balaeva «Almaty» telearnasyna da arnaıy júlde tabystady.
Esterińizge salsaq, «Tumar» Ulttyq televızııalyq báıgesi 2017 jyldan beri QR Mádenıet jáne aqparat mınıstrliginiń bastamasymen uıymdastyrylyp keledi. Basty maqsat – sapaly qazaqstandyq televııany damytý jáne ilgeriletý, televızııalyq kontent óndirisinde talantty mamandardy qoldaý jáne onyń eń myqty ókilderin madaqtaý.