Jibek Joly telearnasy halyq qaharmandaryna 1 mln teńge tabystady
«Jaqsy adam-2023» premııasy Jibek Joly telearnasynan shyǵatyn «Jaqsy adamdarym» jobasy aıasynda uıymdastyryldy. Jobany ónerli jup Qydyráli men Qaraqat júrgizdi. Bıyl marapat ekinshi ret tabystalyp otyr.
Astana turǵyndary men qonaqtary Jańa jyl qarsańynda ǵajaıyp atmosferaǵa toly úlken zalǵa jınaldy. Munda ıne shanshar oryn bolmady. Kórermen bilim berý, ǵylym, medıtsına, sport, qutqarý qyzmeti, quqyq qorǵaý qyzmeti salalarynda úzdik dep tanylǵan naǵyz qaharmandarǵa qol soqty.
Bul joly elimizdiń ár aımaǵynan kelgen jeti qazaqstandyq naǵyz qaharman atandy. Olarǵa 1 mln teńge kóleminde aqshalaı syıaqy tabystaldy. Іs-sharanyń demeýshisi — Jibek Joly telearnasynyń seriktesi Altyn Qyran Foundation qoǵamdyq qory.
Sahnada premııa ıelerin memleket jáne qoǵam qaıratkerleri, óz salasynda abyroıly qyzmet etip júrgen tanymal tulǵalar marapattady.
Birinshi marapatqa Qabanbaı batyr aýylynyń turǵyny, órt sóndirýshi jáne qutqarýshy Arman Aıqynbekov ıe boldy. Oǵan «Jaqsy adamdarym-2023» syılyǵyn Jibek Joly telearnasynyń atqarýshy dırektory Erkejan Kúntýǵanqyzy tabystady.
Bıyl órt sóndirýshi Arman Aıqynbekov taspalanǵan vıdeo jelide keń tarap ketti. Kadrlarda Arman qaharly qys pen aıazǵa qaramaı kıimi muz bop qalǵansha órtti sóndirgeni anyq kórinip turdy. Sol kezde Aqmola oblystyq tótenshe jaǵdaılar departamenti vıdeo Qosshy qalasynda túsirilgenin aıtqan. Armannyń sózinshe, tańǵy 7:30-da jer úıde órt tutanǵan. Sol aıazdy kúni aýa temperatýrasy -40 gradýs bolǵan. Arman órtti sóndirip jatqan sýdan onyń kıimi muz bop qatyp qalǵan. Qyzyl jalyndy tolyq toqtatý úshin órt sóndirýshilerge alty saǵat qajet boldy.
Sodan keıin sahnaǵa Almaty oblysynan kelgen oqýshy Aqjol Geroı kóterildi. Segizinshi synyp oqýshysy adam lyq toly avtobýsty apattan aman alyp qaldy. Aqjol №219 avtobýs júrgizýshisiniń jaǵdaıy kúrt nasharlap ketkenin baıqaǵan. Ol qoǵamdyq kólikti ózi aıdap, der kezinde toqtatyp, jolaýshylardy aman alyp qalǵan. Sol kúni ol qansha adamnyń aman qalýyna sebepshi bolǵanyn saýsaqpen sanap shyǵý múmkin emes. Jas qaharmanǵa músinshe men 1 mln teńge kólemindegi aqshalaı syılyqty «Altyn Qyran» kompanııalar tobynyń quryltaıshysy, «Ulttyq sport» birlestiginiń tóraǵasy Islambek Tóleýbaev tabys etti.
Marapattaý rásimi kezinde Aqjol aqshany qaıda jaratatynyn aıtyp berdi.
— Biz otbasymyzben kólik satyp alýǵa aqsha jınap jatyrmyz. Bul meniń soǵan kishigirim úlesim bolsyn, - dedi Aqjol Geroı.
Sáýle Saǵymbaeva eń meıirimdi jáne jaqsy adam dep tanyldy. Ol Astana qalasyndaǵy J.Tashenov atyndaǵy № 10 mektep-gımnazııada pedagog-defektolog (tıflopedagog) bolyp eńbek etedi. Sáýle Saǵymbaeva erekshe qoldaýǵa muqtaj adamdarǵa qamqor bolady.
2015 jyldan beri Sáýle Lıabıqyzy kórý qabiletinen aıyrylǵan balalarǵa arnalǵan synyptarda jumys isteıdi. Ol «Kórý qabileti nasharlaǵan balalarǵa arnalǵan mektep oqýshylaryn ádistemelik qoldaýmen qamtamasyz etý» avtorlyq bilim berý baǵdarlamasyn jasap shyqty. Osy ádistemeniń arqasynda kóptegen pedagog kásibı qabiletterin damytyp, kórýi nasharlaǵan balalarǵa kómektese bastady. Mekteptegi sabaqtan bólek, Sáýle Saǵymbaevna YouTube blogyn belsendi júrgizip, erekshe balalarmen jumys isteıtin pedagogtarǵa kásibı jáne medıtsınalyq kómek kórsetedi. Oǵan marapatty depýtat Darhan Qydyráli tabystady.
— Jalǵyz adamnyń qolynan eshteńe kelmeıdi. Men de bul mindetti jalǵyz oryndaı almas em. Maǵan únemi áriptesterim — pedagogtar qoldaý kórsetip keledi. Men balalaryma senemin. Árqaısysy ómirden óz jolyn tabady dep oılaımyn. Oqýshylarymnyń ár qadamyn úlken jetistik dep sanaımyn, - dep aǵynan jaryldy pedagog.
Kelesi marapat Ulttyq neırohırýrgııa ortalyǵynyń Tamyrly jáne fýnktsıonaldyq hırýrgııa bóliminiń meńgerýshisi Erbol Mahambetovke berildi. Onyń basshylyǵymen jáne qatysýymen elimizde neırohırýrgııa emhanalyq tájirıbesine alǵash ret kúrdeli aýrýlardy emdeýdiń ınnovatsııalyq tásilderi engizildi. Mıdyń arterıovenozdyq malformatsııasy syndy aýrýlardy emdeýde mıkrohırýrgııa tásilderin engizdi. Bul dert gemorragııalyq ınsýltti týdyratyn sebepterdiń biri. Eger dáriger-ǵalym mundaı emdeý tásilin engizbese qazaqstandyqtar em alý úshin shetel asýǵa májbúr bolatyn edi. Qazirgi kúni joǵarydaǵy emdeý tásili eldiń kóptegen neırohırýrgııalyq emhanalarynda qoldanylady.
Premııa men músinsheni Erbol Mahambetke neırohırýrg, QR Prezıdenti Іs Basqarmasy Medıtsına Ortalyǵy Aýrýhanasynyń hırýrgııa boıynsha dırektor orynbasary Myńjylqy Berdiqojaev tabys etti.
Júregi keń dáriger bul aqshany qaıyrymdylyqqa jumsaýdy sheshken.
— Jaqsy ister munymen bitpeýi kerek. Bul qarjy onkologııalyq aýrýlary bar balalarǵa kómektesse durys bolady dep oılaımyn. Álbette, shetelge shyǵyp, tájirıbe almasyp, jańa bilim alǵan durys. Biraq óz elime qyzmet etip, kómegimizge muqtaj balalardy emdeýdi mindetim dep sanaımyn, - dedi Erbol Mahambetov.
«Jaqsy adamdarym-2023» arnaıy premııasynyń taǵy bir ıegeri — Mereke Edresov.
Qarapaıym qurylysshy ádettegi jumys kúninde oqys jaǵdaıǵa tap bolǵan jasóspirimge kómektesip, ony ajaldan aman alyp qalǵan. Qas qaraıa bastaǵanda ol muz oıylyp, ózenge jasóspirim qulap ketkenin baıqaıdy. Kóp oılanbaı Mereke 17 jastaǵy balany qutqarýǵa asyǵady. Ony sýdan shyǵaryp alyp, dereý jedel járdem shaqyrǵan. Qurylysshy jigit ózine de qaýip tónýi múmkin ekenin múldem oılamaıdy. Oǵan beıtanys balanyń ómiri artyq boldy. Bizdiń zamanymyzdyń qaharmanyna marapatty Májilis depýtaty Janarbek Áshimjanov tabystady.
Paralımpııadalyq qurama múshesi Aısulý Súleımenova «Jaqsy adamdarym — 2023» arnaıy premııasy ıegerleriniń biri atandy. Qyz ózin úlgi ete otyryp, shekteý tek mıymyzda ekenin, múmkindigiń shekteýli bolǵanyna qaramastan damýdy shekteýge bolmaıtynyn kórsetti. Jol-kólik apaty saldarynan aıaǵynan aıyrylǵaly onyń bar ómiri ózgerdi. Aısulý bala kúninen matematıkany jaqsy kórgen, sol sebepti ýnıversıtetke túserde mamandyq tańdaý qıynǵa soqpady. Ol IT-maman atandy. 2018 jyly Aısulý otyryp oınaıtyn voleıbolmen áýestendi. Bıyl mamyrdan bastap kásibı turǵyda júgire bastady.
Ol aıaqqa, ıaǵnı protezge turýǵa jaqyndarynyń qoldaýy ǵana kómekteskenin atap ótti. Aısulý synyp ketpeı, bárin jańa paraqtan bastady.
A. Súleımenova áleýmettik jelilerde belsendi. Ol jeke ómiriniń sátterin jıi bólisip turady. Ózi týraly jazǵanda protezben basqalardan da jarqyn ómir súretinin aıtady. Kóptegen adamǵa úlgi bolyp, motıvatsııalyq spıker retinde jıi sóz sóıleıdi.
Respýblıka kúni qarsańynda Memleket basshysynyń buıryǵymen Aısulý «Shapaǵat» medalimen marapattalǵan bolatyn. Keler jyly ol Parıjde ótetin Paralımpıada oıyndaryna qatysa alady. Búgin ony saltanatty jaǵdaıda Májilis depýtaty Juldyz Súleımenova marapattady.
Ókinishke qaraı, otbasylyq jaǵdaılarǵa baılanysty Aısulý músinshesin alyp ketýge kele almady.
— Jaqynda ájemiz ómirden ótti. Sol sebepti Aısulý is-sharaǵa qatysa almady. Soǵan qaramastan ápkemniń atynan zalda otyrǵan jaqsy adamdardyń bárine alǵys aıtqym keledi. Men ápkemdi maqtan tutamyn. Ol — kóp adamǵa úlgi», - dedi Aısulý Súleımenovanyń músinshesi men premııasyn alyp ketken sińilisi.
Jetinshi marapat polıtsııa aǵa leıtenanty Nursultan Temirbolatqa buıyrdy. Ol dárihanaǵa bara jatqan jolda alabaı ıt balabaqsha aýlasyndaǵy balalarǵa tap bergenin baıqaǵan. Kóliginen atyp shyǵyp, qolyna túsken tasty ustap, balalardy ashýly ıtten qutqarýǵa júgiredi. Nursultan ıtti qýyp jiberdi. Oqıǵa týraly ýchaskelik polıtsııa men ıt aýlaıtyn qyzmetke habarlady. Oǵan marapatty Májilis depýtaty Dáýlet Muqaev tabys etti.
— Uıymdastyrýshylar men zalǵa jınalǵandardyń bárine alǵys aıtqym keledi. Jaqsy adamdar men jaqsy ister kóp bolsyn, - dedi Nursultan Temirbolat.
Ár marapattan keıin sahnaǵa qazaqstandyq estrada juldyzdary — Janbolat pen Jazıra, Tamara Asar, Roza Álqoja, Qydyráli men Qaraqat, Dosymjan Tańatarov, Ibragım Eskendir shyǵyp, án aıtty. Ártister zalǵa jınalǵan qaýymǵa merekelik kóńil-kúı syılady. Premııanyń ár ıegeri týraly LED-ekrannan shaǵyn sıýjet kórsetildi.
Jańa jyl qarsańynda, 30 jeltoqsanda Jibek Joly telearnasynan premııanyń arnaıy telenusqasy kórsetiledi.