Jibek Joly telearnasy «111» atty jańa serıaldyń túsirilimin bastady

<p>ASTANA. KAZINFORM — Jaqynda Jibek Joly telearnasynda «111» Juz on bir atty jańa teleserıaldyń tusaýy kesiledi. Detektıv janryndaǵy týyndynyń túsirilimi búgin bastaldy.</p>

Fılm shynaıy oqıǵaǵa negizdelgen.

Súıiktisinen aıyrylǵan jas advokat Aıjan Kanarova jumystyń sońynda júrip, jeke ómirine kóńil bólmeı qoıady.

Eńbekqor arýdyń biliktiligin baıqaǵan basshylyǵy ony áıelderdi zorlyq-zombylyqtan qorǵaý bólimshesiniń ınspektory etip taǵaıyndaıdy.

Qyzmet barysynda ol turmystyq zorlyqqa ushyraǵan jandardy jolyqtyrady, áıel quqyǵyn qorǵap, olarǵa jan-jaqty kómek pen qoldaý kórsetedi.

Keıde ınspektor Aıjan zorlyq-zombylyqqa qatysty qylmystyq tergeýlerge de qatysady.

Oqıǵanyń shıelenisken tusynda basty keıipkerdiń áriptesteri de otbasylyq qysym kórip júrgeni belgili bolady. Sońynda bári maqsatyna adal bolǵandyqtan problemalardy oıdaǵydaı jeńip shyǵady.

Teleserıaldyń rejısserleri — Beıbit Óner, Berik Jahanov, Modııar Ábdiqadyrov jáne Evgenıı Palamarchýk. 

Prodıýserleri — Anar Júnisova men Anna Chakırtova.

Basty rólderdi tanymal qazaqstandyq akterler Janel Serǵazına men Erkebulan Daıyrov oınaıdy. 

Kórermen 40 túrli oqıǵanyń alǵashqy bólimin «Jibek Joly» telearnasyndaǵy jańa televızııa maýsymynyń basynda, 2024 jyldyń qyrkúıeginde tamashalaıdy. 

Altynbek Ámıt