Jibek Joly kórermenin jańa jyl keshinde qandaı qyzyqtar kútip tur

ASTANA. QazAqparat – Jibek Joly telearnasy jańa jyl merekesine oraı kórermenge birqatar jobany usynady, dep habarlaıdy QazAqparat tilshisi.

Búgin adamzat jańa 2023 jyldy qarsy alady. Adamdar merekege erekshe kóńil-kúımen daıyndalyp, otbasymen birge bolady. Jańa jyl merekesi Qazaqstanda da toılanady.

Elimizdegi jańajyldyq dástúrdiń biri – teledıdardan merekelik baǵdarlamalardy tamashalaý. Osy oraıda Jibek Joly telearnasy qazaqstandyqtardy jańa jyl merekesimen quttyqtaı otyryp, birneshe jobany usynady.

Atap aıtqanda, Jibek Joly telearnasynyń uıymdastyrýymen búgin saǵat 20:30-da «Jaqsy adam-2022» jańajyldyq syılyǵy tabys etiledi.

«Jaqsy adamdarym» telejobasynyń maqsaty – jyl boıyna ár salada jetistikke jetken, el yqylasyna bólengen, qaıyrymdylyq jasap, áleýmettik jelide tanymal bolǵan jandarǵa qurmet kórsetý. Sondaı-aq erlik jasaǵan azamattardy kópshilikke úlgi etý, nasıhattaý.

Atalǵan baǵdarlamanyń júrgizýshileri elimizge tanymal ónerli jup – Qydyráli men Qaraqat.

Halyq batyrlaryn otandyq estrada juldyzdary quttyqtap, án-shashý arnaıdy. Sonymen qatar «Jaqsy adam -2022» nomınatsııasyna ıe bolǵan jandarǵa 1 mln teńgeniń sertıfıkaty beriledi.

Budan bólek, kórermendi saǵat 18:10-da elimizge tanymal ázilkesh Tursynbek Qabatovtyń merekelik keshi kútip tur. Óner ıesiniń sahnada júrgenine 20 jyl toldy. Osy oraıda T. Qabatov qazaqstandyqtardy ázil álemine shaqyrady.

Jibek Joly telearnasy daıyndaǵan taǵy bir syı túngi saǵat 23:00-de Nurlan Qoıanbaevpen «Túngi stýdııa» teleshoýy. Otandyq juldyzdardyń qatysýymen túsirilgen merekelik shyǵarylymda án-dýman, ázil men qyzyqty oıyndar kórsetiledi.