Jibek Joly arnasynda jyly lebizder marafony bastaldy

ASTANA. QazAqparat – Jibek Joly telearnasy jaqyndaryna kógildir ekran arqyly jyly lebiz bildirgisi kelgen adamdarǵa arnap jańa jobany qolǵa aldy, dep habarlaıdy QazAqparat.

Joba meıramǵa toly naýryz aıyna dóp kelip otyr. Qazaqstandyqtar arnaǵa óz jaqyndary men tileýlesterin meırmammen quttyqtap, vıdeo jibere alady. Ol vıdeo arnanyń efırinen beriledi.

Bul múmkindikti alǵashqylardyń biri bolyp akter Meıirǵat Amangeldın paıdalanyp, ustazdarynyń birine arna efıri arqyly alǵys aıtqan.

«Gúlnár apaı, sizge 1 naýryz – Alǵys aıtý kúnine oraı, alǵys aıtqym keledi. Osyndaı bilim berip, tárbıe bergenińiz úshin, qanshama shákirtti tárbıelep jatqanyńyz úshin alǵys bildiremin. Sizge óz atymnan jáne Jibek Joly arnasynyń atynan sálem joldaımyn», - dedi akter.

Buǵan rıza bolǵan ustaz da efır arqyly eńbegin elep, lebiz bildirgen shákirtine, osy ıgi iske muryndyq bolǵan arna ujymyna alǵys aıtty.

Joba avtorlarynyń aıtýynsha, qazaqstandyqtar Jibek Joly arnasy usynyp otyrǵan bul múmkindikti 8 naýryz ben Naýryz merekesi qarsańynda da paıdalana alady.