Jibek Joly arnasynda «El» tok-shoýy: Jalqynyń máselesin jalpymen sheshý

ALMATY. QazAqparat- «Jibek Joly» telearnasynda 19 qyrkúıekten bastap «El» baǵdarlamasy efırge shyǵady. Bul týraly QazAqparat tilshisine baǵdarlama prodıýseri Álııa Qudaıbergen aıtty.

«El» tok shoýynyń prodıýseri Álııa Qudaıbergenniń sózinshe, túsirilim búgin bastaldy.

«Túsirilim bastaldy. «El» - áleýmettik-turmystyq habar. Tok-shoý qarapaıym halyqtyń muń-muqtajy men problemasyna arnalǵan. Keıipkerler elimizdiń barlyq aımaǵynan keledi. Aıta ketetin jáıt, habarǵa qatysatyn adamdardyń jol-shyǵynyn ózimiz kóteremiz. Baǵdarlama keıipkerleriniń sany shektelgen, tórteýden aspaıdy. Óıtkeni, kórermenderdi jalyqtyryp almaýymyz kerek. Al baǵdarlamanyń júrgizýshi - akter, dramatýrg Nartaı Saýdanbekuly»,- deıdi Álııa Qudaıbergen.

Onyń aıtýynsha, qazirgi kúni baǵdarlamany túsirýge 50-den astam qyzmetker atsalysyp jatyr.

«Túsirilim tobynyń maqsaty - áleýmettik problemanyń sheshilýine yqpal etý. Jalqy adamnan, jalpyǵa ótý. Keıipkerdi shaqyryp qana qoımaımyz, onyń máselesin túbegeıli zerttep, oń sheshimin tabýǵa kómektesemiz. Tok- shoý «Jibek Joly» arnasynan aptasyna úsh ret - dúısenbi, sársenbi, juma kúnderi efırge shyǵady. Sonymen qatar, YouTube platformasynan da kórýge bolady. Efır ýaqytynyń uzaqtyǵy 54 mınýt»,- dedi prodıýser.

Eske salaıyq, «QazaqTV» telearnasy rebrendıng jasap, ataýy «Jibek Joly» bolyp ózgerdi. Telearnanyń ataýy ǵana emes, habar taratý kestesi de ózgerdi. Endigi ýaqytta «Jibek Joly» telearnasyn teledıdar pýltiniń 7 sanyn basý arqyly kórýge bolady.