Jibek Joly arnasy Prezıdent bastaǵan chellendjge ún qosty

ASTANA. QazAqparat – Elordanyń EXPO qalashyǵynda Prezıdent Qasym-Jomart Toqaev tusaýyn kesken «Júrek jylý» chellendji Jibek Joly telearnasynyń stýdııasynda jalǵasyn tapty. Aktsııanyń basty sharty – eldiń túkpir-túkpirinen óz muqtajdyǵyn týraly jazyp, járdem suraǵan hat ıesine erikti túrde kómek qolyn sozý, dep habarlaıdy QazAqparat tilshisi.

Jibek Joly telearnasynyń «Bizdiń ýaqyt» saraptamalyq baǵdarlamasyna joba eriktileri Lana Kýznetsova men Mereı Qalel ishi hatqa toly, armandardy oryndaıtyn «sıqyrly sandyqty» ákeldi.

Ideıa avtorlary kúntizbede naýryz aıy bastalǵan sátten beri búkil Qazaqstannan hat jınaǵan. Mereı Qaleldiń aıtýynsha, búginge deıin 300-ge jýyq hat kelip túsken. Sonyń birin baǵdarlama júrgizýshi sýyryp, hat ıesiniń shaǵyn armanyn kórermenge pash etti.

Madııar esimdi jetkinshek hatta boksshy bolǵysy keletinin jazypty.

«Esimim – Madııar, bokspen aınalysqandy jaqsy kóremin. Súıikti sportymmen úıde shuǵyldaný úshin bir boks grýshasy bolsa, jaqsy bolar edi. Bolashaqta chempıon bolǵym keledi», - dep jazypty hat ıesi.

Osylaısha Jibek Joly telearnasy Prezıdent bastaǵan chelledjdi jalǵastyryp, Madııar esimdi balaǵa boks grýshasyn jetkizip berýge mindetteme aldy.

Joba eriktileri tikeleı efırden barsha kórermendi sıqyrly sandyqqa kelip túsken hattardyń báriniń oryndalýyn qadaǵalaıtyndaryp aıtyp, sendirdi.