«Jas Otan» jastar qanatynyń 2025 jylǵa deıingi baǵdarlamasy tanystyryldy

NUR-SULTAN. QazAqparat – «Jas Otan» jastar qanatynyń tóraǵasy Elnur Beısenbaev uıymnyń 2025 jylǵa deıingi «Jastar - Otanǵa!» baǵdarlamasyn tanystyrdy, dep habarlaıdy QazAqparat tilshisi.

«Biz partııamyzdyń tóraǵasy - Elbasy Nursultan Nazarbaevtyń tikeleı tapsyrmasymen «Jastar - Otanǵa!» baǵdarlamasynyń jobasyn ázirlegen bolatynbyz. Qazirgi tańda bul joba jastardyń arasynda qyzý talqyǵa túsip jatyr. Baǵdarlama jastardyń barlyq sanatyn qamtıdy. Ol bes baǵyttan turady. Birinshisi – azamattyq belsendilik, ekinshisi – sapaly bilim, úshinshisi – jumysqa ornalasý jáne jumyspen qamtý, tórtinshi – jas otbasylardy baspanamen qamtý jáne qoljetimdi baspana, besinshisi – tulǵalyq damý jáne bos ýaqytty tıimdi ótkizý», - dedi baǵdarlamany OKQ alańynda tanystyrǵan Elnur Beısenbaev.

Onyń aıtýynsha, baǵdarlama jasalmas buryn «Jas Otan» Jastar qanatynyń músheleri el boıynsha onlaın jáne oflaın rejımde 200-ge tarta kezdesý ótkizgen.

«Sol kezdesýlerdiń aıasynda jastar tarapynan 4 myńǵa jýyq usynys jınadyq. Jalpy «Jastar - Otanǵa!» baǵdarlamasyn ázirleý barysynda qandaı máselelerge den qoıdyq. Birinshiden jastar arasynda áleýmettik saýalnama júrgizildi. Ekinshiden Kanada, Germanııa sekildi elderdiń jastar saıasatyn qoldaý boıynsha halyqaralyq tájirıbelerin zerttedik. Sondaı-aq BUU jastardy qoldaý strategııasy – osy baǵdarlamanyń negizderiniń biri boldy. Jalpy bul baǵdarlamany daıyndaǵan kezde Memleket basshysynyń Joldaýda jastarǵa qatysty aıtqan máselelerin qamtydyq», - deıdi ol.

Aıta keterligi, «Jas Otan» jastar qanatynyń quramyna 106 myń azamat bar.