Jas Otan volonterleri 5 mıllıon maskany tegin taratýdy bastady

NUR-SULTAN. QazAqparat – Muqtaj otbasylar Nursultan Nazarbaevtyń bastamasymen qurylǵan «Birgemiz» qoǵamdyq qorynan tegin maskalar alady. Birneshe kúnniń ishinde «Jas Otan» eriktileri Nur-Sultan, Almaty jáne Shymkent qalalarynda 100 myńnan astam otbasyna jeke qorǵanys quraldaryn jetkizedi, dep habarlaıdy QazAqparat Nur Otan partııasynyń baspasóz qyzmetine silteme jasap.

Ótken túnde eriktiler 5 mıllıon maskany aldyn ala orap daıyndady. Búginde olar maskalardy turǵyndardyń álsiz toptaryna, sonyń ishinde jalǵyzbasty qarttarǵa, kópbalaly jáne az qamtylǵan otbasylarǵa, jetim balalarǵa, ardagerlerge, erekshe qajettilikteri bar jáne t.b. azamattarǵa jetkizýdi bastap ketti.

Sonymen qatar, kúni keshe Nursultan Nazarbaev muqtaj adamdarǵa tikeleı ataýly kómek kórsetýdiń ekinshi tolqyny bastalatynyn aıtty. Buǵan deıin Elbasynyń tapsyrmasymen «Birgemiz» qorynan 152 myńnan astam otbasyna 50 myń teńge kóleminde birjolǵy kómek kórsetildi. Endi jınalǵan qarajattyń aıasynda taǵy da 200 myńnan astam turmysy tómen otbasyn qamtý josparlanyp otyr. Otbasylyq koeffıtsıenti esepke ala otyryp, shamamen 1 mıllıon adamǵa kómek kórsetiledi dep kútilýde.

Sondaı-aq, ekinshi tolqyn kezinde muqtajdardy múmkindiginshe kóbirek qamtý maqsatynda buryn kómek almaǵan otbasylarǵa basymdyq beriledi. Jýyq arada oblys ákimderi men áleýmettik qorǵaý organdary kómek alýshylardyń tıisti tizimderin ázirleıdi. Kómek kórsetý merzimi - mamyr aıynyń basy.

Nur Otan partııasynyń jastar qanaty azyq-túlik jıyntyqtaryn jetkizý jumystaryn kúsheıtti. Al Jas Otan»eriktileri buǵan deıin búkil el boıynsha 56 myń muqtaj otbasyǵa kómek kórsetken bolatyn.