«JańaDala/GreenDay 2024» kórmesine 200 kompanııa qatysyp jatyr
Al, kórmede zamanaýı aýyl sharýashylyǵy tehnologııalary, asyl tuqymdy tórt túlik, agrotýrızm salasyndaǵy ınnovatsııalyq ázirlemeler qoıylǵan. Elimizdiń túkpir-túkpirinen jınalǵan sala mamandary tájirıbe almasyp, jańashyldyqtarymen bólisýde.
Forýmnyń ashylýyna sóz alǵan QR Aýyl sharýashylyǵy mınıstri Aıdarbek Saparov mundaı is-sharalar sharýalar úshin óte mańyzdy ekenin atap ótti.
«Memleket basshysy 5 jyl ishinde aýyl sharýashylyǵy jalpy ónimin eki esege arttyrýǵa tapsyrma berdi. Ol úshin ósimdik sharýashylyǵynda da, mal sharýashylyǵynda da zamanaýı tehnologııalardy engizip, agrarlyq ǵylymnyń jetistikterin paıdalaný mańyzdy. Bul rette, «JańaDala/GreenDay 2024» kórmesinde óndiris tıimdiligin arttyratyn túrli tehnıkalar qoıylǵan. Munda álemniń 20 elinen 200 kompanııa sońǵy úlgidegi tehnologııalaryn usynyp otyr. Sharýalar ózara tájirıbe almasyp, jańa tehnıkalardy óz sharýashylyǵynda keńinen qoldanýǵa nıetti», - dedi mınıstr.
Sondaı-aq, ol elimizde óndiris pen tıimdi eksportty ulǵaıtýǵa múmkindik bar ekenin atap ótti. Aýyl sharýashylyǵy jerleriniń jalpy aýdany 200 mıllıon gektardan asady eken. Onyń ishinde 25 mıllıon gektar egistik jer jáne 180 mıllıon gektar jaıylym tirkelgen.
«Mundaı kórsetkishter aýyl sharýashylyǵy óndirisin keńeıtýge úlken múmkindik beredi. Ósimdik jáne mal sharýashylyǵyndaǵy barlyq derlik tehnologııalyq protsess sýbsıdııalanady. Jeńildetilgen nesıeler men lızıng beriledi. AÓK úshin arnaıy salyq rejımi qoldanylady», - dedi Aıdarbek Saparov.
Kórmede alyp tehnıkalarmen qatar, asyl tuqymdy iri qara, qoı túrleri jurt nazaryna tústi. Salmaǵy 800 keliden asatyn Angýs tuqymdy buqaǵa, turpaty buzaýǵa uqsas dorper qoıyna jınalǵandar qyzyǵýshylyq tanytyp jatty.