Izraılmen aradaǵy shıelenis Iran qazaqtaryna qalaı áser etti – Elshi jaýaby

<p>ASTANA. KAZINFORM &ndash; Iran Islam Respýblıkasynyń Qazaqstandaǵy Tótenshe jáne Ókiletti Elshisi Alı Akbar Djoýkar qazaqstandyq BAQ ókilderimen kezdesýde óz elindegi ulty qazaq azamattardyń Qazaqstanǵa qonys aýdarý múmkindikteri týraly pikir bildirdi.</p>

«Iran men Izraıl arasyndaǵy jaǵdaı qaıta ýshyǵýy múmkin be? Sol mańǵa sapar josparlaǵan, qazir eki eldiń birinde kásip júrgizip, oqý oqyp júrgen Qazaqstan azamattaryna Tegeran tarapynyń dıplomaty retinde qandaı keńes beresiz?» - dep surady BAQ ókili.

Iran Elshisi qazir Iranda jaǵdaı turaqty ekenin aıtady.

«Izraılde júrgen qazaqstandyqtarǵa qatysty eshteńe aıta almaımyn. Al Iranǵa kelsek, qazirgi tańda bizdiń elde «Iran EKSPO» deıtin bıylǵy eń úlken saýda-ekonomıkalyq shara uıymdastyrylǵan. Ol jerde 117 memlekettiń ókilderi, sonyń ishinde Qazaqstannan onnan astam adamnan quralǵan delegatsııa qatysyp jatyr. Keshe ǵana osy kórme aıasynda Iran men Qazaqstan kásipkerleriniń kezdesýi ótip, adam mol jınaldy. Qysqasy, Iranda jaǵdaı qalypty», - dedi ol.

Kezdesýde Irandaǵy qazaq dıasporasynyń qazirgi ahýaly da sóz boldy. 

«Ondaǵy ulty qazaq Iran azamattary Qazaqstanǵa qonys aýdaryp, azamattyǵyn aýystyrǵysy kelse, Tegeran tarapynan qandaı da bir shekteý bolýy múmkin be? Qazaqstanǵa qaıtqysy keletin ulty qazaq Iran azamattary bolsa, olarǵa eshqandaı kedergi bolmaı ma?» - dep surady jýrnalıst.

Elshi qandaı da bir elde áskerı, saıası oqıǵalar bolǵan kezde mundaı máseleniń ortaǵa shyǵýy qalypty jaǵdaı dep esepteıtinin jetkizdi.

«Ondaı másele ár elde bolady. Mysaly, Qazaqstanda da daǵdarys jaǵdaıy bolsa, bizdegi azamattar da sondaı máseleler kóterýi múmkin. Biraq Iranda jaǵdaı qalypty, eshqandaı qaýip joq. Halyqaralyq sharalardyń ózi kestege saı ótedi. Elimizdegi sharalarǵa álem elderiniń 2 myńnan astam ókili qatysyp jatyr. 

Irannyń Gúlstan provıntsııasynda ulty qazaq ırandyqtar turatynyn bilesiz. Ótken aptada sol jerde Iran halyqtarynyń mádenı festıvali ótip, ulttyq taǵamdary, kúres túrleri kórsetildi. Sondyqtan Iranda eshqandaı alańdaýshylyq joq. Ol jaqta eshkimniń eshqaıda kóshkisi kelmeıdi. Qazir eki eldiń arasynda 14 kúndik vızasyz rejım bar. Sol arqyly eki eldiń azamattary qalaǵan ýaqyttarynda kelip, kete alady. Sondyqtan Iran qazaqtarynyń arasynda elden ketý týraly alańdaýshylyq bar dep oılamaımyn. Izraılge qarsy áskerı operatsııa bolyp jatqan kezde men Iranda edim. Ol kezde de halyqtyń ishinde eshqandaı alańdaýshylyq bolǵan joq», - dedi Alı Akbar Djoýkar.