Izraılge nemese Gazaǵa ásker jiberý josparymyzda joq – AQSh vıtse-prezıdenti

<p>Qurama Shtattar Izraılge nemese Gaza sektoryna ásker jiberýdi josparlap otyrǵan joq. Bul týraly AQSh vıtse-prezıdenti Kamala Harrıs CBS News arnasyna bergen suhbatynda málimdedi. Kazinform bul týraly Anadoly aqparat agenttigine silteme jasap habarlaıdy.</p>

Vıtse-prezıdent Izraıl «ózin-ózi qorǵaýǵa quqyly» ekenin, biraq «HAMAS pen palestınalyqtardy shatastyrmaý kerektigin» basa aıtty.

Onyń sózinshe, palestınalyqtar ızraıldiktermen qatar qaýipsizdikke, óz taǵdyryn ózi sheshýge, jáne qurmetke laıyqty.

Harrıs sonymen qatar Izraıl-Palestına qaqtyǵysynda soǵys erejelerin ustaný qajettigin atap ótti. Al Irandy bul máselege aralaspaýǵa shaqyrdy.

7 qazan kúni tańerteń HAMAS-tyń «Izz ad-Dın ál-Qassam brıgadalary» áskerı qanaty Izraılge qarsy «Ál-Aqsa tasqyny» operatsııasynyń bastalǵanyn habarlady. Gaza sektorynan Izraılge qaraı myńdaǵan zymyran atylyp, qarýly toptar Izraıl eldi mekenderine basyp kirdi.

HAMAS bul operatsııanyń okkýpatsııalanǵan Shyǵys Ierýsalımdegi Ál-Aqsa meshitine jasalǵan shabýyl jáne ızraıldik qonystanýshylar tarapynan palestınalyqtarǵa zorlyq-zombylyqtyń kúsheıýine jaýap retinde jasalǵanyn aıtty.

Buǵan jaýap retinde Izraıl armııasy ondaǵan joıǵysh ushaqty paıdalanyp, Gaza sektorynda HAMAS-qa qarsy «Temir qylyshtar» operatsııasyn bastaıtynyn málimdedi.

Izraıl-Palestına qaqtyǵysy ýshyǵa bastaǵannan beri 8 myńnan astam palestınalyq qaza tapty. Resmı derek boıynsha, kóz jumǵan palestınalyqtardyń 70 paıyzǵa jýyǵy – áıelder men balalar.

Izraılde qaza bolǵandar sany 1400 adamnan asty.

Gaza sektorynyń 2,3 mln turǵyny Izraıldiń jappaı áýeden bombalaýynan jáne anklavtyń tolyq blokadasy saldarynan bolǵan azyq-túlik, sý jáne dári-dármek tapshylyǵynan zardap shegip otyr.

BUU Bas Assambleıasy gýmanıtarlyq júk jetkizý úshin atysty dereý toqtatýǵa shaqyrdy. Bul rette Iordanııa usynǵan qarardy 120 memleket qoldady. Alaıda Izraıl bul usynysty qabyldamady.