Izraıldiń Gaza sektoryna jasaǵan áýe shabýylynan 46 palestınalyq qaza tapty

<p>ASTANA. KAZINFORM - Izraıl áýe kúshteri Gaza sektoryna áli soqqy berip jatyr. Beısenbi kúngi sońǵy jarylys saldarynan Nýseırat bosqyndar lagerinde 33 adam qaza tapty, taǵy 13 palestınalyq anklavtyń ońtústiginde gýmanıtarlyq kómek alyp bara jatqan kezde mert boldy.</p>

Palestına bıliginiń habarlaýynsha, beısenbi kúngi shabýyl qonys aýdarǵan palestınalyq otbasylar pana qylǵan Nýseırat bosqyndar lagerindegi poshta bólimshesine baǵyttalǵan. Soqqy saldarynan jaqyn mańdaǵy úıler de qırady.

Saldarynan 33 adam qaza taýyp, taǵy 50 adam jaralandy. Qaıtys bolǵandardyń kóbi bir otbasynyń músheleri ekeni habarlandy. Gaza sektorynyń BAQ-pen baılanys keńsesi qaza tapqandardyń kópshiligi ash-Sheıh Álıdiń otbasy músheleri ekenin atap ótti.

Nýseırat – 1948 jylǵy soǵystan keıin palestınalyq bosqyndarǵa arnalǵan Gaza sektoryndaǵy segiz tarıhı lagerdiń biri. Búginde bul anklavtyń ár túkpirinen qonys aýdarǵan adamdar shoǵyrlanǵan, tyǵyz qonystanǵan qalalyq aımaqtyń bóligi.

Izraıl áskerıleri soqqylardyń gýmanıtarlyq kómektiń jetkizilýine kedergi keltirýge tyrysqan HAMAS sodyrlaryna baǵyttalǵanyn aıtty.

Áskerılerdiń aıtýynsha, bul áreket Gaza azamattaryna arnalǵan júktiń qaýipsizdigin qamtamasyz etý úshin qajet boldy, al HAMAS ony jetkizýge kedergi keltirdi dep aıyptalǵan.

Qarýly toptar birneshe ret júk kólikterin basyp alǵan, al HAMAS olarǵa qarsy turý úshin arnaıy top qurǵan. HAMAS derekkózderiniń habarlaýynsha, HAMAS basqaratyn kúshter sońǵy aılarda bandanyń jıyrmadan astam múshesin óltirdi.

Osyǵan deıin Amnesty International Izraıldi Gaza sektorynda genotsıd jasady dep aıyptaǵanyn jazdyq.