Izraıl júrgizgen reıd kezinde palestınalyq jýrnalıst qaza tapty

AMMAN. QazAqparat – «Ál-Jazıra» telearnasynyń jýrnalısi Iordan ózeniniń Batys jaǵalaýyndaǵy Djenın qalasynda Izraıl júrgizip jatqan reıd kezinde oqqa ushty, dep habarlaıdy QazAqparat menshikti tilshisi AR-ǵa silteme jasap.

Oqıǵa sársenbi kúni tańerteń bolǵan. Palestınalyq jýrnalıst ári telearna reporteri Shırın Abý Aklege oq tıip, kóp uzamaı qaıtys bolǵan. Taǵy bir telearna jýrnalısi — palestınalyq Alı Samýdı arqasynan jaraqat alyp, aýrýhanaǵa tústi. Onyń jaǵdaıy turaqty.

«Palestına Densaýlyq saqtaý mınıstrliginiń habarlaýynsha, Shırınniń basyna oq tıgen. Ol aýrýhanaǵa aýyr jaǵdaıda jetkizildi, keıinirek dárigerler onyń qaıtys bolǵanyn jarııalady» dep habarlaıdy WAFA Palestına agenttigi.

Óz kezeginde Izraıl bıligi tergeýdi bastady jáne jýrnalıst Palestına tarapynan atylǵan oqtan qaza bolýy múmkin ekenin joqqa shyǵarmaıdy.

Telearnanyń habarlaýynsha, Izraıl sarbazdary Shırınniń reportaj kezinde basqa adamdardan erekshelenetin «press-kúrteshe» kıgenine qaramastan, oǵan oq jaýdyrǵan. Izraıl áskerıleri Djenındegi operatsııa kezinde ózderine jarylǵysh zattar men oq atylǵandyqtan, olarǵa «jaýap qaıtarǵanyn» habarlady. Áskerıler «bul oqıǵany zerttep, jýrnalısterdi palestınalyq sodyrlar jaralaǵan degen boljamdy zerttep jatyrmyz» dedi.