Izraıl Joǵarǵy sot týraly daýly zań jobasyn qabyldady
64 parlament múshesi maquldap, qarsy shyqqandar bolmaǵan zań jobasy Joǵarǵy sotty Izraıl úkimetiniń negizsiz dep tapqan áreketterin toqtatý quqyǵynan aıyrady. Bul – sot bıligin shekteýge baǵyttalǵan reformalardyń ishinde maquldanǵan alǵashqysy. Qarsylyq tanytýshylardyń pikirinshe, reforma eldegi demokratııa negizderine qaıshy keledi. Ótken aptada Izraıl premer-mınıstri Bınıamın Netanıahý zań jobasyna qatysty daýys berýden bas tartýy, tipti keıbir bólikterin jumsartýy múmkin degen qaýeset taraǵanymen, 73 jastaǵy kóshbasshy, kerisinshe, ony qoldap, keshe aýrýhanadan shyqqannan keıin parlamentke keldi. BBC News jazýynsha, dúısenbi tańerteń Izraıl parlamenti ǵımaraty janyndaǵy býlvardy jaýyp qalǵan narazy topqa sýatqyshpen oq atylǵan. Jergilikti BAQ aqparaty boıynsha, qarsylyqqa shyqqan bir adam jaralanyp, altaýy tutqyndalǵan. Narazy toptyń basqa ókilderi polıtsııa fýrgonyn qorshaýǵa alyp, ofıtserlerge «masqara» dep daýystady. Daýly reforma Izraıl tarıhyndaǵy eń kúrdeli ishki daǵdarysty týdyrdy. Jyl basynan beri júz myńdaǵan demonstrant apta saıyn kóshege shyǵyp, demokratııaǵa shabýyl jasalǵanyna qarsylyq bildiredi. Úkimet reforma demokratııany nyǵaıtatynyn, keıingi onjyldyqta Joǵarǵy sottyń saıasatqa bıligi kóp bolyp ketkenin aıtty.
Buǵan deıin Izraıldiń Tel-Avıv qalasynda 150 myńnan astam adam sot reformasyna qarsy taǵy da sherýge shyqqanyn jazǵan edik. Jyl basynan beri 28-ret mıtıngige shyqqan jurttyń qalaýy – parlamenttiń ókilettigin kúsheıtip, Joǵary Sottyń quzyretin shekteıtin sot reformasynan bas tartý.