Izraıl men HAMAS tutqyndardy bosatýǵa, soǵysty ýaqytsha toqtatýǵa kelisti

<p>Izraıl úkimeti birneshe saǵatqa sozylǵan kelissózden keıin HAMAS tobymen kelisimdi maquldady.&nbsp;<a href="https://kaz.inform.kz/" target="_blank" rel="noopener">Kazinform</a>&nbsp;bul týraly <a href="https://t.me/bbcrussian/56684" target="_blank" rel="noopener">VVS-ge</a> silteme jasap habarlaıdy.</p>

Kelisimge sáıkes 7 qazanda Izraılden ustap áketilgen tutqyndardy bosatý, soǵys is-qımyldarynda úzilis jasaý jáne jaýap retinde ızraıldik túrmelerden palestınalyqtardyń bir bóligin jiberý kózdelgen.

Kelisimniń egjeı-tegjeıi:

• HAMAS sodyrlary ızraıldik 50 tutqyndy – tek azamattyq tulǵalardy, áıelder men balalardy bosatady;
• Izraıl Gaza sektorynda oq atýdy toqtatady – ol 4 kúnge jalǵasady;
• Izraıl túrmelerden palestınalyq 150-ge jýyq adamdy (tsıfrlar áli naqtylanǵan joq) – áıelder men kámeletke tolmaǵandardy bosatady;
• Oq atý toqtatylǵan kúnderi Gazaǵa gýmanıtarlyq kómek pen otyn tıelgen júk kólikteri kirgiziledi.

Izraıldiń Haaretz basylymynyń jazýynsha, jospar boıynsha atys toqtatylatyn 4 kúnde HAMAS «kepilge alynǵan 30 balany, 8 anany jáne taǵy 12 áıeldi» bosatady.

Izraıl aqparat quraldarynyń habarlaýynsha, tutqyndardy bosatý beısenbi kúni bastalýy múmkin. 

Times of Israel gazeti úkimettegi derekkózge silteme jasap málim etkendeı, kelisim maquldanǵannan keıin Izraıl túrmeden shyǵarylatyn palestınalyqtar týraly tolyq aqparatty jarııalaýy tıis.

HAMAS pen Izraıl kelissóz júrgizip jatqanyn buǵan deıin habarlaǵan bolatynbyz.

Aıta keteıik, Saýd Arabııasynyń Syrtqy ister mınıstri Feısal ıbn Farhan ál-Saýd Arab-Islam sammıtin uıymdastyrýǵa jaýapty komıtet jumysyn bastaǵanyn málim etken edi. Komıtetke Gazada atysty toqtatý boıynsha is-qımyldardy ázirleý júktelip otyr. Osy maqsatta Arab jáne ıslam elderiniń syrtqy ister mınıstrleri Qytaıǵa, keıin basqa da elderge baratyny aıtyldy.

20 qarashada arab jáne ıslam elderiniń SІM basshylary Qytaıǵa saparlap, QHR syrtqy ister mınıstri Van I myrzamen Palestına máselesin tez arada sheshý joldaryn talqylady.

Al keshe, 21 qarashada arab jáne ıslam elderi syrtqysaıasat vedomstvolarynyń basshylary Taıaý Shyǵystaǵy ahýaldy talqylaý úshin Reseıge bardy.