Izraıl SІM spıkeri Qazaqstandaǵy ushaq apatyna baılanysty kóńil aıtty

NUR-SULTAN. QazAqparat - Izraıl Syrtqy ister mınıstrligindegiler 27 jeltoqsanda Almaty mańynda bolǵan ushaq apatyna baılanysty kóńil aıtty, dep habarlaıdy QazAqparat cursorinfo.co.il saıtyna silteme jasap.

«Izraıl memleketi Qazaqstan halqyna Almaty qalasynyń mańynda Bek Air Flight Z92100 ushaǵynyń apatqa ushyraýyna baılanysty qaıǵyryp, kóńil aıtady. Zardap shekkenderdiń jyldam saýyǵyp ketýin tileımiz»,-dep jazdy óziniń Twitter-degi paraqshasynda Izraıl Syrtqy ister mınıstrliginiń spıkeri Lıor Haıat.

«Aıta keteıik, Qazaqstanda 27 jeltoqsan kúni azańda ushaq apatqa ushyrap, sonyń saldarynan 12 adam mert boldy. Apattan mert bolǵandardyń ishinde 2 Ýkraına azamaty, Qytaı, Qyrǵyzstan men Qazaqstannyń azamattary bolǵan. Apattyń saldarynan 60-qa jýyq adam zardap shekti. Qazaqstanda aza tutý kúni jarııalandy»,-delingen habarlamada.

Aıta keteıik, 27 jeltoqsan kúni Almatydan Nur-Sultan qalasyna ushyp shyqqan ushaq radardan joǵalyp ketti.

Keıin 93 jolaýshysy jáne 5 ekıpaj múshesi bar ushaqtyń apatqa ushyraǵany málim boldy.

Oqıǵanyń mán-jaıyn anyqtaý úshin ushaq qulaǵan aýmaqqa arnaıy komıssııa ushyp shyqty.

Qaıǵyly oqıǵaǵa baılanysty el prezıdenti Qasym-Jomart Toqaev apattan qaıtys bolǵandardyń jaqyndary men týystaryna kóńil aıtty.

Apattyń hronologııasyn myna jerden oqýǵa bolady.