Izraıl resmı túrde "soǵys jaǵdaıy" rejımin engizdi

<p>Izraıl bıligi elde "soǵys jaǵdaıy" rejımin engizý týraly sheshim qabyldady. Bul endigi jerde aýqymdy áskerı operatsııalar júrgiziletinin bildiredi. Bul jóninde eldiń premer-mınıstri Bınıamın Netanıahýdyń kantselıarııasy málimdegen, dep habarlaıdy QazAqparat <a href="https://tass.ru/mezhdunarodnaya-panorama/18943193" target="_blank" rel="noopener">TASS</a> agenttigine silteme jasap.&nbsp;</p>

— Izraıl memleketine qarsy soǵys keshe 06:00-de (senbi, 7 qazan, 2023 jyl) Gaza sektorynyń qanquıly terrorlyq shabýyldarynan bastaldy, —delingen habarlamada.

Kantselıarııanyń naqtylaýynsha, sheshim "soǵys jarııalaý nemese aýqymdy áskerı is-áreketterdi bastaý" kezinde quqyqtyq sheńberdi aıqyndaıtyn "Basty zań: Úkimet" dep atalatyn qujattyń 40-babynyń negizinde mınıstrler kabınetiniń ruqsaty arqyly qabyldandy. 

Evreı halqynda bul zań Konstıtýtsııanyń ornyna júretin basty zańdardyń biri sanalady, sebebi bul elde naqty Konstıtýtsııanyń ózi joq, tek ornyna qoldanylatyn negizgi zańdar men túrli quqyqtyq qujattar bar. 

Aıta keteıik, keshe Hamas sodyrlary Izraılge zymyranmen shabýyl jasap, 20-dan astam adam mert boldy.

Eýropalyq Odaq Hamastyń Izraılge shabýylyn aıyptady. 

«Eýropalyq Odaq shıelenisken jaǵdaıdy odan saıyn ýshyqtyryp, Palestına halqynyń beıbit ómirge degen úmitin úzetin mán-maǵynasy joq shabýyldar men zorlyq-zombylyqty dereý toqtatýǵa shaqyrady. Eýropalyq Odaq búgingideı beı-bereketsiz, aıaýsyz jasalǵan shabýyldar jaǵdaıynda ózin halyqaralyq zańdarǵa sáıkes qorǵaýǵa quqy bar Izraıldi qoldaıdy» delingen habarlamada.

Sondaı-aq, «QazAqparat» agenttiginiń menshikti tilshisi "Izraıl «soǵys jaǵdaıynda»: Qazirgi sáttegi ahýal qalaı?" atty materıalynda keshegi jaǵdaıǵa aýqymdy sholý jasaǵan edi. 

Búgin Qazaqstannyń Tel-Avıvtegi Elshiligi Qazaqstan azamattaryna Izraılde qalyptasqan jaǵdaıǵa baılanysty úndeý jasady.

«Qaýipsizdik salasy boıynsha jaǵdaıdyń shıelenisýine baılanysty Qazaqstannyń Izraıldegi Elshiligi Qazaqstan azamattaryna (naqtyraq aıtqanda eldiń ońtústigindegilerge) tyldaǵy Basshylyqtyń buıyryǵyn oryndap, qaýipsiz jerge turaqtap, ol jerden resmı bılik ókilderiniń habarlaýynsyz eshqaıda shyqpaýǵa keńes beredi» delingen habarlamada.

Odan bólek, Izraıldegi jaǵdaıǵa qatysty QR Syrtqy ister mınıstrliginiń baspasóz hatshysy Aıbek Smadııarov pikir bildirdi.