Izraıl óziniń alǵashqy delegatsııasyn Sýdanǵa jiberdi

HARTÝM. QazAqparat – Izraıl ókilderi Sýdan astanasy Hartýmǵa bardy. Bul – ótken aıda taraptar qarym-qatynasty qalypqa keltirý týraly kelisimge kelgennen keıingi alǵashqy sapar, dep habarlaıdy QazAqparat Middle East Monitor -ǵa silteme jasap.

Dúısenbi kúni Izraıl delegatsııasy Sýdanǵa AQSh-tyń deldaldyǵymen eki eldiń bıligi bir aı buryn qarym-qatynasty qalypqa keltirgený týraly kelisimge kelgennen keıin ekonomıkalyq jáne gýmanıtarlyq yntymaqtastyqty talqylaý úshin alǵash ret bardy.

Kelissózder barysynda Sýdanǵa aýylsharýashylyǵy, azyq-túlik qaýipsizdigi, sýmen jabdyqtaý jáne densaýlyq saqtaý salasyndaǵy kómek máseleleri qozǵaldy. Izraıldik delegattar Hartýmdaǵy AQSh elshiliginiń ókilderimen de kezdesti.

«Sýdanǵa kelgen alǵashqy delegatsııanyń sońynan birneshe aptadan keıin úlken «ekonomıkalyq delegatsııa» attanady. Bul yntymaqtastyq týraly kelisimge qol qoıý yqtımaldyǵyn arttyrady «, - dep atap ótti ızraıldik delegatsııa ókili Elı Koen.

Sýdan BAÁ men Bahreınnen keıin osy jyly Izraılmen qarym-qatynasty qalypqa keltirý týraly kelisimge qol qoıǵan úshinshi arab eli boldy. Kelisimge qol qoıylǵan kúni AQSh prezıdenti Donald Tramp Kongreske Sýdandy terrorızmge demeýshi elder tiziminen shyǵarý kerek dep habarlady.

Osy ýaqytqa deıin arab elderinen tek Egıpet pen Iordanııa ǵana evreı memleketimen dıplomatııalyq qarym-qatynasta boldy.

Osy ýaqytta Izraıldiń arab elderiniń basym kópshiligimen dıplomatııalyq qarym-qatynas ornatýy Palestına ákimshiliginiń qatty aıyptaýyna sebep boldy