Izraıl men Lıvan qaqtyǵysy sońǵy eki aptada 1030 adamnyń ómirin qıdy

<p>ASTANA. KAZINFORM &ndash; 16 qyrkúıekten beri Izraıldiń Lıvanǵa jasaǵan shabýylynan 1030 adam qaza taýyp, 6352 adam jaraqat aldy. Bul týraly <a href="https://www.aa.com.tr/ru/%D0%BC%D0%B8%D1%80/%D0%B2-%D1%80%D0%B5%D0%B7%D1%83%D0%BB%D1%8C%D1%82%D0%B0%D1%82%D0%B5-%D0%B0%D1%82%D0%B0%D0%BA-%D0%B8%D0%B7%D1%80%D0%B0%D0%B8%D0%BB%D1%8F-%D0%BD%D0%B0-%D0%BB%D0%B8%D0%B2%D0%B0%D0%BD-%D0%B7%D0%B0-%D0%BF%D0%BE%D1%81%D0%BB%D0%B5%D0%B4%D0%BD%D0%B8%D0%B5-%D0%B4%D0%B2%D0%B5-%D0%BD%D0%B5%D0%B4%D0%B5%D0%BB%D0%B8-%D0%BF%D0%BE%D0%B3%D0%B8%D0%B1%D0%BB%D0%B8-1030-%D1%87%D0%B5%D0%BB%D0%BE%D0%B2%D0%B5%D0%BA/3344697" target="_blank" rel="noopener">Anadoly </a>agenttigi jazdy.</p>

Bul týraly Lıvan densaýlyq saqtaý mınıstri Fıras Abıad Beırýtte ótken baspasóz máslıhatynda málimdegen.

Ol 8 qazan men 15 qyrkúıek aralyǵynda Izraıl armııasynyń Lıvanǵa jasaǵan shabýyldary nátıjesinde 610 adam qaza tapqanyn, onyń ishinde 38 áıel men 17 bala, 2056 adam jaralanǵanyn atap ótti.

16-27 qyrkúıek aralyǵynda Izraıl shabýyldary 1030 adamnyń ómirin qıdy, dep qosty ol.

Mınıstr sońǵy eki aptada qaza tapqandar arasynda 156 áıel men 87 bala bolǵanyn, sondaı-aq osy ýaqyt ishinde 6 352 adamnyń jaralanǵanyn aıtty.

Izraıldiń shabýyldary 8 qazanda bastalǵannan bergi shaıqasta barlyǵy 1640 adam qaza taýyp, 8408 adam jaraqat aldy.

Izraıl shabýyldarynda osy ýaqytqa deıin 194 áıeldiń qaza tapqanyn atap ótken ol úıindiler astynda áli tabylmaǵan nemese aty-jóni anyqtalmaǵan adamdardyń bar ekenin de basa aıtty.

Abıad sonymen qatar sońǵy shabýyldarda 27 qyrkúıekten beri taǵy 11 adamnyń qaza taýyp, 108 adamnyń jaralanǵanyn atap ótti.

Aıta keteıik, Izraıl armııasy Hezbolla jetekshisi Hasan Nasrallanyń qaza bolǵanyn habarlaǵan bolatyn.

«Hezbolla» óz jetekshisi Hasan Nasrallanyń qaza bolǵanyn rastady.

Izraıldiń Beırýtke jasaǵan shabýylynan Hasan Nasrallamen qatar IRSK basshysy mert boldy.