Izraıl men HAMAS qaqtyǵysynda 31 jýrnalıst mert boldy

<p>Amerıkanyń jýrnalısterdi qorǵaý komıteti 31 qazandaǵy jaǵdaı boıynsha 31 jýrnalıst jáne BAQ qyzmetkeri Izraıl men HAMAS qaqtyǵysynyń qurbany boldy dep málimdedi. <a href="Kazinform" target="_blank" rel="noopener">Kazinform </a>bul týraly <a href="https://cpj.org/2023/10/journalist-casualties-in-the-israel-gaza-conflict/" target="_blank" rel="noopener">cpj.org</a> saıtyna silteme jasap habarlaıdy.</p>

Komıtet jýrnalıster týraly barlyq aqparatty – qaza tapqan, jaralanǵan, tutqynǵa alynǵan nemese qaqtyǵys kezinde iz-túzsiz joǵalyp ketkender týraly, sondaı-aq soǵys qımyldarynyń kórshiles Lıvanǵa tarap ketýinen zardap shekkenderdi zerttep jatyr. Komıtettiń aldyn ala tergeýi janjal bastalǵaly, ıaǵnı 7 qazannan beri eki tarapta óltirilgen 9000-nan astam adamnyń 31-i jýrnalıst jáne BAQ qyzmetkeri ekenin kórsetti.

27 qazanda Reuters agenttigi jýrnalısteri ızraıldik soqqy nysanyna aınalmaıtynyna kepildik surady. Izraıl qorǵanys áskeri (TsAHAL) Reuters jáne Agence France Press aqparat agenttikterine jaýap retinde Gaza sektorynda jumys isteıtin jýrnalısterdiń qaýipsizdigine jaýap bere almaıtynyn málim etti.

Izraıl Gaza qalasyna qurlyqtan shabýyl jasaýǵa daıyndalyp jatqan sátte, Izraıl joıqyn áýe soqqylaryn jiberip, baılanys buzylyp, elektr energııasy sónip jatqan kezde aqparat taratýǵa tyrysyp jatqan Gaza sektoryndaǵy jýrnalıster kún saıyn ólimmen betpe-bet keledi.
31 qazandaǵy jaǵdaı:

31 jýrnalıstiń ólimi rastaldy: 26 palestınalyq, 4 ızraıldik jáne bireýi Lıvan azamaty.
8 jýrnalıst jaralanǵany, 9 tilshi iz-túzsiz joǵalyp ketkeni nemese tutqynǵa alynǵany habarlandy.

Sondaı-aq komıtet basqa jýrnalısterdiń ólimi, joǵalyp ketkeni, tutqynǵa alynǵany, jaralanǵany nemese qaýip tónip turǵany jaıly, BAQ keńseleri men jýrnalıster úıine zaqym kelgeni týraly aqparattardy tekserip jatyr.

«Jýrnalıster – daǵdarys kezinde mańyzdy jumys atqaryp jatqan beıbit azamattar, olar qaqtyǵys taraptarynyń qýdalaýyna ushyramaýy kerek», - dedi Taıaý Shyǵys pen Soltústik Afrıka boıynsha Komıtet baǵdarlamalarynyń úılestirýshisi Sherıf Mansýr.