Izraıl men HAMAS qaqtyǵysy soǵystan terrorızmge aýysty – Rım Papasy Frantsısk

<p>Rım Papasy sársenbi tańynda HAMAS tutqynǵa alǵan ızraıldikterdiń týystarymen, sondaı-aq Gaza sektorynda otbasylary zardap shegip otyrǵan palestınalyqtarmen jeke kezdesýler ótkizdi. Kezdesýlerden keıin ol qaqtyǵys soǵys sheńberinen shyǵyp, &laquo;terrorızmge&raquo; aınalǵanyn aıtty. Kazinform agenttiginiń tilshisi bul týraly <a href="https://www.vaticannews.va/en/pope/news/2023-11/pope-francis-audience-palestine-israel-hostages-meeting.html" target="_blank" rel="noopener">Vatican News</a>-ke silteme jasap habarlaıdy.</p>

Óziniń rezıdentsııasyndaǵy kezdesýlerden keıin kóp uzamaı Áýlıe Petr alańyndaǵy jalpy aýdıentsııada jospardan tys sóz sóılegen Frantsısk qaqtyǵysta «eki taraptyń qalaı zardap shegip jatqanyn» estigenin aıtty. Rım Papasy Frantsısk eki kezdesýde de óz qaıǵysyn jáne olardyń qaıǵysyna jaqyndyǵyn bildirdi.

«Soǵys ne istemeıdi. Biraq osy jerde soǵystan tys shyqtyq. Bul – soǵys emes. Bul – lańkestik», - dedi pontıfık.

Ol óz úndeýinde ártúrli soǵystardan, ásirese Ýkraına, Izraıl jáne Palestınada zardap shekkenderdiń barlyǵy úshin duǵa etti.

Papa tańǵy saǵat 7:30-da Kasa-Santa-Martadaǵy rezıdentsııasynda Izraıl delegatsııasynyń 12 múshesimen kezdesti. Sodan keıin tańǵy saǵat 8:00-de Pavel VI zalynda Palestına delegatsııasymen kezdesti. Palestına delegatsııasynyń quramynda 10 adam boldy.

«Palestına halqy úshin duǵa eteıik, Izraıl halqy úshin, beıbitshilik bolsyn dep duǵa eteıik», - dep qorytyndylady Rım Papasy.

Kıeli TAq baspasóz qyzmetiniń dırektory Matteo Brýnıdiń birneshe kún buryn Rım Papasy Frantsısk delegatsııalarmen kezdesetinin jarııalap, bul kezdesýler Rım Papasynyń «zardap shekken árbir adamǵa rýhanı jaqyndyǵyn» kórsetý maqsatynda «tek gýmanıtarlyq sıpatta» bolatynyn atap ótti.